Ես պատասխանատվություն եմ կրում այն քաղաքացիների համար, որոնք երեկ վնասվել են. Սաղաթելյան

© Sputnik / Aram NersesyanԻշխան Սաղաթելյան
Իշխան Սաղաթելյան - Sputnik Արմենիա, 1920, 04.06.2022
Բաժանորդագրվեք
Yandex newsTelegram
Սաղաթելյանի խոսքով` հենց այդ պատասխանատվությունն է ստիպել, որ պայքարի մեջ մտնեն։
ԵՐԵՎԱՆ, 4 հունիսի – Sputnik. «Դիմադրություն» շարժման անդամ, ԱԺ փոխնախագահ, «Հայաստան» խմբակցության պատգամավոր Իշխան Սաղաթելյանը Ֆրանսիայի հրապարակում ընթացող հանրահավաքում հայտարարեց, որ անձամբ պատասխանատվություն է կրում այն քաղաքացիների համար, որոնք երեկ վնասվել են Երևանի Պռոշյան-Դեմիրճյան փողոցների հատման տարածքում։
Սաղաթելյանը պատասխանեց երեկվանից հնչող հարցադրմանը, թե ովքեր են պատասխանատվություն կրում տեղի ունեցած բախումների համար։

«Այս պարագայում անձնավորում եմ, որովհետև երեկվանից անձնավորված են խոսում։ Ես այս շարժման բոլոր պրոցեսների համար անձամբ պատասխանատվություն եմ կրում։ Մենք ո՛չ պատասխանատվությունից խուսափող ենք, ո՛չ փախչող։ Մեզ հենց այդ պատասխանատվությունն է ստիպել, որ այս պայքարի մեջ ենք։ Բայց դուք` օրվա իշխանություննե՛ր, պատասխանատվություն եք կրում այն 5000 տղաների համար, որոնց պատերազմում զոհաբերեցիք»,- ասաց Սաղաթելյանը։

Հայտնել ենք, որ Պռոշյան-Դեմիրճյան-Պարոնյան փողոցների խաչմերուկում ընդդիմության անհնազանդության ակցիայի ժամանակ երեկ` հունիսի 3-ին, բախում է տեղի ունեցել ակցիայի մասնակիցների և ոստիկանների միջև։
Արդյունքում տուժել են թե՛ քաղաքացիական անձիք, թե՛ ոստիկանության ծառայողներ, դեպքի առթիվ հարուցվել է քրեական գործ, կան ձերբակալվածներ։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։
Լրահոս
0