Խարդախության գործով շուրջ 130 քաղաքացի է տուժել. 1 անձ կալանավորվել է

Քննչական կոմիտե - Sputnik Արմենիա, 1920, 14.06.2022
Բաժանորդագրվեք
Yandex newsTelegram
32-ամյա տղամարդը և խմբի մյուս անդամներն իրենց հանցավոր գործունեության ընթացքում օգտագործել են նաև խաբեության այլ եղանակներ։
ԵՐԵՎԱՆ, 14 հունիսի – Sputnik. ՀՀ–ում խարդախության բազմադրվագ գործով տուժել է 129 անձ։ Տեղեկությունը հայտնում է ՀՀ քննչական կոմիտեի մամուլի ծառայությունը։
Դեպքի առթիվ հարուցված քրեական գործով 1 մեղադրյալի մասով նախաքննությունն ավարտվել է։ Քննությամբ պարզվել է, որ հանցավոր խմբի գործողություններից տուժած անձանցից խարդախությամբ հափշտակվել է ընդհանուր 140․246․430 ՀՀ դրամ գումար։
Նախաքննությամբ ձեռք բերված ապացույցներով պարզվել է` 32-ամյա տղամարդը, 2019թ. հուլիսից մինչև 2021թ. ապրիլն ընկած ժամանակահատվածում, տարբեր անձանցից խարդախությամբ առանձնապես խոշոր չափերով հափշտակություն է կատարել։ Թվով 9 և դեռևս ինքնությունները չպարզված այլ անձանց հետ, նախ իր հիմնադրած վարկային ընկերության, ապա առանց պետական գրանցման 19 տարբեր անվանումներով իբրև վարկային կազմակերպություններ ներկայացվող գրասենյակների անունից «Ֆեյսբուքում» գրանցված էջերով գովազդի միջոցով տարածել է շահավետ պայմաններով վարկեր տրամադրելու վերաբերյալ հայտարարություններ:
Դրանց հիման վրա իրենց դիմած քաղաքացիներին հրավիրել են իբրև վարկերի տրամադրման միջնորդ կազմակերպության գրասենյակներ։ Այնտեղ հայտնել են` կարող են այնպես անել, որպեսզի վերջիններս տարբեր բանկերից և վարկային կազմակերպություններից իբր ցածր տոկոսներով միջնորդավճարով վարկային գումար ստանան։
«Այդ գործընթացից հետո հաճախորդներին ուղեկցել են տարբեր բանկեր, վարկային և առևտրային կազմակերպություններ և չարաշահելով նրանց վստահությունը՝ վերցրել են տրամադրված վարկային գումարները, ապրանքները կամ դրանց ստացման կտրոնները, խաբեությամբ ներկայացրել, թե իբր անհրաժեշտ է կատարել վերջնահաշվարկ, իրացնել ձեռք բերված ապրանքները, հաշվարկել միջնորդավճարների չափը, որից հետո միայն ամբողջությամբ կտրամադրեն խոստացված գումարները, սակայն չեն տրամադրել և հափշտակել են»,– ասված է հաղորդագրությունում:
Քննությամբ պարզվել է նաև, որ 32-ամյա տղամարդը և խմբի մյուս անդամներն իրենց հանցավոր գործունեության ընթացքում օգտագործել են նաև խաբեության այլ եղանակներ։ Իրենց դիմած քաղաքացիներից պարզել են վերջիններիս անձնական տվյալները և նրանց անվամբ վճարային համակարգում գրանցել հաշիվներ, որոնց միջոցով վարկային ընկերություններից մեկից առցանց ստանացել են վարկային գումարներ, գումարները նրանց չեն տրամադրել և հասանելիություն ունենալով գրանցված հաշիվներին՝ կանխիկացրել ու հափշտակել դրանք:
Դեպքեր են եղել, երբ իրենց դիմած անձանց ուղեկցել են ՀՀ բանկերից մեկի տարբեր մասնաճյուղեր, խաբեությամբ հաճախորդներից ստացել վերջիններիս անուններով բացված «Mobile Banking» ծառայության մուտքի տվյալներն ու բանկից առցանց ստացել են վարկային գումարներ, չարաշահելով քաղաքացիների վստահությունը՝ գումարները նրանց չեն տրամադրել և հետագայում հափշտակել դրանք։
Ձեռք բերված բավարար ապացույցների համակցությամբ՝ 32-ամյա տղամարդուն մեղադրանք է առաջադրվել՝ ՀՀ քրեական օրենսգրքի 178-րդ հոդվածի (Խարդախությունը) 3-րդ մասի 1-ին կետով, որպես խափանման միջոց նրա նկատմամբ կիրառվել է կալանավորումը:
Վերջինիս վերաբերյալ մասն առանձնացվել է առանձին վարույթում, հայտարարվել նախաքննություն ավարտի մասին, և քրեական գործը, մեղադրական եզրակացությունը հաստատելու և դատարան ուղարկելու միջնորդությամբ, ուղարկվել է դատավարական ղեկավարում իրականացնող դատախազին։
Լրահոս
0