Կարող էինք 30-40 աստիճան արևի տակ պահել հրապարակը, վատնել մեր ռեսուրսը. Սաղաթելյան

© Sputnik / Aram NersesyanԻշխան Սաղաթելյան
Իշխան Սաղաթելյան - Sputnik Արմենիա, 1920, 16.06.2022
Իշխան Սաղաթելյան
Բաժանորդագրվեք
Yandex newsTelegram
Իշխան Սաղաթելյանի խոսքով` իրենց խնդիրը վրանները պահելով ինչ–որ բան ցույց տալը չէր։
ԵՐԵՎԱՆ, 16 հունիսի – Sputnik. «Դիմադրություն» շարժումը վրանների համար չէր, վրաններն էին շարժման համար. շարժումը հսկայական արդյունք ունեցավ այդ վրանները տեղադրելով։ Այսօր հրավիրված ասուլիսում այս հայտարարությունն արեց «Դիմադրություն» շարժման անդամ Իշխան Սաղաթելյանը։
«Լինում են պահեր, երբ գալիս է ծանր որոշում կայացնելու հարցը, մեզ համար հեշտ չէր այդ որոշումը կայացնել, սակայն մենք պատասխանատու ենք շարժման վերջնարդյունքի համար։ Եկել էր մի պահ, որ պետք է գնահատեինք վրանների արդյունավետության հարցը։ Կարող էինք օրական մի քանի հարյուր քաղաքացիների հետ 30-40 աստիճան արևի տակ պահել Ֆրանսիայի հրապարակը, վատնել մեր ռեսուրսն ու ջլատել ուժերը»,–ասաց Սաղաթելյանը։
Նրա խոսքով` նպատակահարմարության և արդյունավետ շարունակության հարց կար, և իրենց խնդիրը վրանները պահելով ինչ–որ բան ցույց տալը չէր. վերջնական արդյունքն է կարևոր։
Սաղաթելյանը հավելեց, որ հանրահավաքներին մասնակցող տասնյակ հազարավոր քաղաքացիներից չկարողացան ձևավորել կանոնավոր «քաղաքացիական բանակ», որոնք կարող էին անհնազանդության ակցիաները հասցնել այն ծավալի, որ իշխանությունն այլևս չդիմանար։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանն ազդարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` Երևանում կազմակերպվում են անհնազանդության երթեր ու հանրահավաքներ, այլ միջոցառումներ։
«Դիմադրություն» շարժման անդամ Իշխան Սաղաթելյանը հունիսի 14-ին հայտարարեց, որ վրանային ավանը լիարժեք կատարել է իր գործը և հունիսի 15-ին վրանները հավաքելու են, ինչը, սակայն, պայքարի ավարտ չի նշանակում. գնալու են մինչև վերջ:
Հունիսի 15-ի առավոտյան Ֆրանսիայի հրապարակն ազատվեց վրաններից, ավելի քան 40-օրյա ընդմիջումից հետո վերականգնվեց երթևեկությունը։
Լրահոս
0