ՀՀ–ում առուվաճառքի առցանց հարթակների միջոցով ավելի քան 18 միլիոն դրամ են հափշտակել

© Pixabay / tookapicՀամակարգչի դիմաց նստած տղամարդ
Համակարգչի դիմաց նստած տղամարդ - Sputnik Արմենիա, 1920, 12.07.2022
Համակարգչի դիմաց նստած տղամարդ
Բաժանորդագրվեք
Yandex newsTelegram
ՀՀ գլխավոր դատախազությունը ներկայացրել է, թե ինչ սցենարներով են իրագործվում հանցագործությունները։
ԵՐԵՎԱՆ, 12 հուլիսի – Sputnik. Առուվաճառքի առցանց հարթակների օգտագործմամբ ապրանքներ վաճառողներից խարդախությամբ հափշտակություն կատարելու դեպքերն ավելացել են. նշված հանցագործության դեպքերով պատճառված վնասն այս տարվա առաջին կիսամյակում գերազանցել է 18 միլիոն դրամը։ Տեղեկությունը հայտնում է ՀՀ գլխավոր դատախազությունը։

«2022թ. 1-ին կիսամյակի ընթացքում գրանցվել է նշված եղանակով կատարված հանցագործության 145 դեպք, որոնցից միայն 11 դեպքով հանցավոր արարքներն ավարտին չեն հասցվել քարտի հաշվին գումար չլինելու պատճառով: Հարուցվել է 82 քրեական գործ, որոնցից բացահայտվել է ընդամենը 2-ը»,– ասված է հաղորդագրությունում։

Նշվում է նաև, որ հանցագործությունները կատարվում են հիմնականում 2 սցենարով: Մի դեպքում արտերկրյա կամ տեղական հեռախոսահամարների տակ գրանցված «WhatsApp» հավելվածի միջոցով անհայտ անձինք կապ են հաստատում հայտարարություն տվողի հետ և խնդրում տրամադրել նրանց բանկային քարտի տվյալները` ապրանքը գնելու և գումարը քարտին փոխանցելու համար: Վերջիններս «գնորդին» տրամադրում են իրենց բանկային քարտի տվյալները, այդ թվում՝ կոդերը։ Դրանից հետո հանցագործները նրանց բանկային քարտից կանխիկացնում են եղած գումարները:
Մյուս դեպքում հանցագործներն ապրանքը գնելու պատրվակով նույն միջոցներով կապ են հաստատում հայտարարություն տվողների հետ, ցանկություն հայտնում գնել ապրանքը: Սակայն պատճառաբանելով, թե իբր այլ բնակավայրում են բնակվում, նրանք առաջարկում են «ՀայՓոստի» միջոցով կնքել էլեկտրոնային պայմանագիր։ Հանցավորներն ուղարկում են այսպես կոչված «ՀայՓոստի» ծուղակային հղում, որտեղ անձինք գրանցվում են՝ գրանցելով նաև բանկային տվյալները և կոդերը: Իսկ հանցավորը համակարգչային տեխնիկայի օգտագործմամբ, բանկային տվյալները ներբեռնելով, կարողանում է բանկոմատային քարտում եղած գումարը այլ խաղային կամ անձնական հաշիվների փոխանցելով հափշտակում են դրանք:
ՀՀ դատախազությունը հորդորում է ոչ մի դեպքում այլ անձանց չտրամադրել իրենց բանկոմատային քարտերի պահպանվող վավերապայմանները՝ դրանց վրա առկա թվերը, հատկապես PIN կոդը:
Ոստիկանությունը ահազանգում է խարդախության նոր մեխանիզմի մասին. քարտի տվյալներ մի՛ տվեք
Լրահոս
0