Հայաստանը վերջապես ԳՇ պետ ունի. նախագահը հրամանագիր է ստորագրել

© Photo : official site of MoD of RAԷդվարդ Ասրյան
Էդվարդ Ասրյան - Sputnik Արմենիա, 1920, 14.07.2022
Էդվարդ Ասրյան
Բաժանորդագրվեք
Yandex newsTelegram
ՀՀ ԶՈւ գլխավոր շտաբի պետի պաշտոնը գրեթե հինգ ամիս թափուր էր։ Էդվարդ Ասրյանը Օնիկ Գասպարյանի հայտարարության տակ ստորագրած 44 պաշտոնյաներից մեկն էր:
ԵՐԵՎԱՆ, 14 հուլիսի – Sputnik. ՀՀ նախագահ Վահագն Խաչատուրյանը ԶՈւ գլխավոր շտաբի պետ է նշանակել Էդվարդ Ասրյանին։ Հրամանագիրը հրապարակվել է նախագահի պաշտոնական կայքում։
«Հիմք ընդունելով վարչապետի առաջարկությունը՝ համաձայն Սահմանադրության 155-րդ հոդվածի 3-րդ մասի, ինչպես նաև «Զինվորական ծառայության և զինծառայողի կարգավիճակի մասին» օրենքի 35.1-ին հոդվածի 1-ին մասի և 36-րդ հոդվածի 1-ին մասի 1-ին կետի` Էդվարդ Ասրյանին նշանակել Հայաստանի Հանրապետության զինված ուժերի գլխավոր շտաբի պետ՝ հինգ տարի ժամկետով»,– ասված է փաստաթղթում:
Ասրյանը մինչ այդ զբաղեցնում էր ՀՀ ԶՈւ ԳՇ օպերատիվ գլխավոր վարչության պետի-ԶՈւ ԳՇ պետի տեղակալի պաշտոնը (նշանակվել էր 2021թ. մայիսի 21-ին)։ Փետրվարի 25-ին ԶՈւ գլխավոր շտաբի 44 գեներալներ հայտարարություն էին ստորագրել՝ պահանջելով վարչապետ Նիկոլ Փաշինյանի հրաժարականը։ Ասրյանն այդ հայտարարության տակ ստորագրած 44 պաշտոնյաներից մեկն էր:
Հիշեցնենք, որ 2022թ-ի փետրվարի 24-ից ՀՀ ԶՈւ ԳՇ պետի պաշտոնը թափուր էր։ Այդ օրը Արտակ Դավթյանը երկրորդ անգամ ազատվեց ԳՇ պետի պաշտոնից։ Նա այդ պաշտոնում նշանակվել էր 2021-ի մարտի 22-ին՝ փոխարինելով Օնիկ Գասպարյանին։ Իսկ մինչ այդ Դավթյանը ԳՇ պետի պաշտոնը զբաղեցրել էր նաև 2018-ի մայիսից մինչև 2020-ի հունիսն ընկած ժամանակահատվածում։
Փետրվարի 28-ից ԳՇ պետի պարտականությունները կատարում էր ԳՇ պետի առաջին տեղակալ, գեներալ-լեյտենանտ Կամո Քոչունցը։
Նշենք, որ ԱԺ-ն հուլիսի 7-ին ամբողջությամբ ընդունեց «Պաշտպանության մասին» ՀՀ օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը, որով ՀՀ զինված ուժերի գլխավոր շտաբի պետն ի պաշտոնե կլինի պաշտպանության նախարարի առաջին տեղակալը:
Լրահոս
0