Ծիծեռնակաբերդի խճուղում աշխատանքները կոպիտ խախտումներով են արվել. դատախազություն են դիմել

© Photo : official site of MES of RA Ծիծեռնակաբերդի խճուղու փլուզված հատվածը
Ծիծեռնակաբերդի խճուղու փլուզված հատվածը - Sputnik Արմենիա, 1920, 23.07.2022
Ծիծեռնակաբերդի խճուղու փլուզված հատվածը
Բաժանորդագրվեք
Yandex newsTelegram
Ըստ ՔՏՀԱ տեսչական մարմնի` Երևանի քաղաքապետը նախագծման թույլտվությանը չհամապատասխանող աշխատանքային նախագիծ է համաձայնեցրել։
ԵՐԵՎԱՆ, 23 հուլիսի – Sputnik. Ծիծեռնակաբերդի խճուղում շինարարության ընթացքում թույլ տված խախտումների հիմքով ՀՀ քաղաքաշինության, տեխնիկական և հրդեհային անվտանգության (ՔՏՀԱ) տեսչական մարմինը հանցագործության մասին հաղորդում է ուղարկել դատախազություն։ Տեղեկությունը հրապարակվել է տեսչական մարմնի ֆեյսբուքյան էջում։
Մայիսի 20-ին Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում ճանապարհը փլուզվել էր, ինչի հետևանքով խճուղին մինչև հունիսի 14-ը երկկողմանի փակ էր։
Տեսչական մարմնի ուսումնասիրության արդյունքում պարզվել է, որ այդ տարածքում շինարարություն իրականացնող «Սահակյանշին» ընկերությունը շինաշխատանքներն իրականացրել է համաձայնեցված աշխատանքային նախագծից կոպիտ շեղումներով։
«Քանդման և հողային շինարարական աշխատանքներն իրականացվել են շինարարական հրապարակի սահմաններից դուրս՝ համայնքային սեփականության հողամասի սահմաններում՝ խճուղու եզրագծով։ Բացի այդ, շինաշխատանքների ընթացքում չի պահպանվել համաձայնեցված աշխատանքային նախագծով նախատեսված փոսորակի լանջի 27 աստիճան թեքությունը, որի պատճառով տեղի է ունեցել խճուղու մի հատվածի փլուզում»,– ասված է հաղորդագրությունում։
Նշվում է նաև, որ նախագիծը 2020-ի հունիսի 26-ին համաձայնեցվել է Երևանի նախկին քաղաքապետ Հայկ Մարությանի հետ, իսկ վերջերս էլ` 2022թ․ մարտի 31-ին, վերահամաձայնեցվել գործող քաղաքապետ Հրաչյա Սարգսյանի կողմից։
Ըստ տեսչական մարմնի` Երևանի քաղաքապետի կողմից նախագծման թույլտվությանը չհամապատասխանող աշխատանքային նախագիծ է համաձայնեցվել։
ՀՀ քաղաքաշինության, տեխնիկական և հրդեհային անվտանգության տեսչական մարմինը «Սահակյանշին» ընկերությանը տրամադրած արտոնագիրը դադարեցնելու միջնորդություն է ներկայացրել քաղաքաշինության կոմիտե։ Իրավախախտում թույլ տված բոլոր քաղաքաշինական սուբյեկտների նկատմամբ կիրառվել են ՀՀ օրենսդրությամբ նախատեսված վարչական պատասխանատվության միջոցներ։
Լրահոս
0