Фон для радио  - Sputnik Արմենիա, 1920
ՌԱԴԻՈ

Թեհրանից հնչող հայտարարությունը քայլ էր, որին Երևանը պիտի պատասխանի. իրանագետ

Հնարավոր է՝ Թեհրանում հայ-իրանական սահմանի փակման իրական վտանգ են զգացել․ իրանագետ
Բաժանորդագրվեք
Yandex newsTelegram
Իրանագետ Ահարոն Վարդանյանը Sputnik Արմենիայի եթերում մեկնաբանել է Իրանից տարբեր մակարդակներով հայ-իրանական սահմանի վերաբերյալ հնչող հայտարարությունները։
Իրանական կողմից անընդհատ հայ-իրանական սահմանի մասին հնչող հայտարարությունները ցույց են տալիս, որ այդ սահմանը չափազանց կարևոր է և ռազմավարական նշանակություն ունի Իրանի համար։ Իրանագետ Ահարոն Վարդանյանը Sputnik Արմենիայի եթերում այսպես մեկնաբանեց Թեհրանից հնչող հայտարարությունները։
Նշենք, որ Իրանի հոգևոր առաջնորդը հուլիսի 19-ին Թուրքիայի նախագահի հետ զրույցում հայտնել էր, որ Իրանի համար հայ-իրանական սահմանը կարևոր է և այն չպետք է խախտվի։ Օրեր անց Իրանից տարբեր մակարդակներով այս հայտարարությունը մեկնաբանեցին նաև տարբեր պաշտոնյաներ ու հոգևորականներ, այդ թվում՝ պատգամավորներ։
«Հոգևոր առաջնորդի հայտարարությունը, ըստ էության, ուղեցույց է ողջ իրանական դաշտի համար։ Դրանից հետո բնական է, որ նրա հայտարարությունը պետք է զարգացնեին տարբեր մակարդակներով։ Պատահական չէ, որ տարբեր գործիչներ նրա խոսքից տարբեր հատվածներ են տարածում, փորձում են թեմաները բացել»,- կարծում է իրանագետը։
Վարդանյանը նշում է, որ այս հայտարարությունը անելուց առաջ, հնարավոր է, որ Թեհրանում հայ-իրանական սահմանի փակման կամ այլ ռիսկային իրական վտանգ են զգացել, դրա համար էլ եղել է հոգևոր առաջնորդի հայտարարությունը, որին հետևել է տարբեր գործիչների կողմից այդ հայտարարության հիմնական մտքի տարածումը։
«Երևի իրանական կողմն ունի նաև այլ տեղեկություններ՝ կապված սահմանի վտանգավորության հետ, այդ պատճառով էլ նմանատիպ հայտարարություններով փորձում է կանխել ընդհանրապես սահմանի փակվելու ինչ-որ դեպք կամ նույնիսկ հավանականություն»,- ասաց Վարդանյանը։
Անդրադառնալով թուրքական կողմից հնչող, այսպես կոչված, «Զանգեզուրի միջանցքի» գործարկման մասին հայտարարություններին, Վարդանյանը նշեց, որ Իրանում փորձում են կանխել դրա գործարկումը, քանի որ այդ դեպքում գուցե ոչ իրավաբանորեն, բայց փաստացի հայ-իրանական սահմանը կկտրվի։
Իրանագետը կարևոր է համարում, թե հայկական կողմն ինչպես կորսա այդ ազդակները։
«Քայլ արդեն արվել է, կարծում եմ, պետք է հայկական կողմից համապատասխան արձագանքը լինի»,- նշեց Վարդանյանը։
Ավելի վաղ Թեհրանի ժամանակավոր իմամ Աբու Թերաբիֆարդն ուրբաթօրյա աղոթքի քարոզի ժամանակ հայտարարել է, որ Հայաստանի հետ ճանապարհը պետք է անխափան գործի։ Նրա խոսքով՝ այդ ճանապարհը հազար տարեկան է և տարածաշրջանի ժողովուրդների անվտանգության, խաղաղության և հզորության գործոններից մեկն է։
Լրահոս
0