Ավետիք Չալաբյանի փաստաբանները ցուցադրաբար լքեցին դատարանի դահլիճը

© Sputnik / Aram NersesyanԱրթուր Հարությունյան
Արթուր Հարությունյան - Sputnik Արմենիա, 1920, 26.07.2022
Արթուր Հարությունյան
Բաժանորդագրվեք
Yandex newsTelegram
Պաշտպանական կողմը նշեց, որ իրենք զրկված են Չալաբյանին պաշտպանելու հնարավորությունից, քանի որ իրենց և պաշտպանյալին ժամանակ չեն տրամադրել գործի նյութերին ծանոթանալու համար։
ԵՐԵՎԱՆ, 26 հուլիսի – Sputnik. «Համախմբում» շարժման անդամ, ընդդիմադիր հասարակական-քաղաքական գործիչ Ավետիք Չալաբյանի պաշտպաններ Վարազդատ Հարությունյանն ու Արթուր Հարությունյանը ցուցադրաբար լքեցին դատական նիստի դահլիճը։
Ավելի վաղ հայտնել էինք, որ Չալաբյանի գործով առաջին նիստը մեկնարկել է Երևանի ընդհանուր իրավասության դատարանի Կենտրոն նստավայրում։ Չալաբյանը և նրա պաշտպանական կողմը հայտարարել էին, որ իրենց չեն տրամադրել գործի նյութերը։ Հասարակական-քաղաքական գործիչը դատավորից պահանջել էր գործը վերադարձնել քննիչին։
Դատական նիստը ընդմիջելուց հետո դատավոր Մնացական Մարտիրոսյանը Չալաբյանին հայտնեց, որ նիստը լքած երկու պաշտպանների դեմ սանկցիա է կիրառվել դատարանի նկատմամբ անհարգալից վերաբերմունքի համար։
«Դուք կարող եք դիմել դատարանին, որպեսզի ձեր նախընտրած պաշտպանները ծանուցվեն և ներկայանան հաջորդ նիստին, օրինակ` վաղը։ Եթե ձեր պաշտպանները չներկայանան, դատարանը ստիպված է լինելու դիմել Հանրային պաշտպանի գրասենյակ` ներգրավելով հանրային պաշտպանի` անկախ ձեր ցանկությունից»,- ասաց Մարտիրոսյանը։
Չալաբյանը նշեց, որ իր պաշտպանական իրավունքը պետք է ամբողջությամբ վերականգնվի, դատարանը պետք է տրամադրի գործի նյութերը և ողջամիտ ժամանակ տա գործի նյութերին ծանոթանալու համար։
«Ես պնդում եմ, որ պաշտպանությունն իրականացնեն իմ պաշտպանները, ոչ թե որևէ հանրային պաշտպան»,- ասաց Չալաբյանը։
Դատավոր Մարտիրոսյանն էլ նշեց, որ Չալաբյանի պաշտպանական իրավունքի խախտման հանգամանքների կամ վարույթը քննիչին վերադարձնելու վերաբերյալ որևէ պատշաճ հիմնավորում չի ներկայացվել դատարանին։
«Պաշտպանների կողմից դատական նիստերի դահլիճը լքելը իրավական հետևանքներ են առաջացնելու, ընդհուպ վարույթից հեռացնելը»,- ասաց նա։
Հաջորդ դատական նիստը տեղի կունենա վաղը` հուլիսի 27-ին, ժամը 16.30-ին։
Ավետիքը լավ է զգում, բոլորից հանգիստ է. Չալաբյանի կինը պատմել է անելիքների մասին
Հիշեցնենք` Ավետիք Չալաբյանը ձերբակալվել է ուսանողական խորհրդի նախագահին նյութապես շահագրգռելու կասկածանքով։ Քննչական մարմնի պնդմամբ` նյութապես շահագրգռելու նպատակը Հայաստանի ազգային ագրարային համալսարանի ուսանողների մասնակցությունն ընդդիմության ցույցերին ապահովելն է։
Այս գործով Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 163-րդ հոդվածի 3-րդ մասի 2-րդ կետի հատկանիշներով (երթերին կամ ցույցերին մասնակցելուն բռնություն գործադրելով կամ դա գործադրելու սպառնալիքով հարկադրելը) հարուցվել է քրեական գործ։
Չալաբյանը կալանավորվել է մայիսի 14-ին։
Լրահոս
0