Արգելել են Հայաստան մուտք գործել նաև Հոլանդիայի Հայ դատի ղեկավարին

© Sputnik / Asatur Yesayants«Զվարթնոց» օդանավակայան
«Զվարթնոց» օդանավակայան - Sputnik Արմենիա, 1920, 01.08.2022
«Զվարթնոց» օդանավակայան
Բաժանորդագրվեք
Yandex newsTelegram
ՀՅԴ Արևմտյան Եվրոպայի կենտրոնական կոմիտեն պայքարելու է, որ Հայաստանի իշխանությունը հեռանա։
ԵՐԵՎԱՆ, 1 օգոստոսի – Sputnik. Նիդեռլանդների Հայ դատի գրասենյակի ատենապետ Մասիս Աբրահամյանին արգելել են մուտք գործել Հայաստան։ Տեղեկությունը հայտնում է ՀՅԴ Արևմտյան Եվրոպայի կենտրոնական կոմիտեի մամուլի ծառայությունը։
Կոմիտեի կարծիքով` պատրաստվել է անցանկալի անձանց ցուցակ։
Նշենք, որ Մասիս Աբրահամյանը նիդեռլանդական «Գարեգին Նժդեհ» երիտասարդական միության անդամ Սյունե Աբրահամյանի հայրն է, որին նույնպես չէին թողել մուտք գործել Հայաստան։

«Եվս մեկ անգամ ընդգծում ենք, որ երկիրը դեպի անդունդ տանող փաշինյանական դավադիր վարչախմբի գործիքի վերածված ԱԱԾ-ն իր կոչմանը հավատարիմ չէ և հավասարապես պատասխանատու է ազգադավ այս որոշումների համար։ Մենք մերժում ենք նման վարքագիծը։ Իրավական և բոլոր հնարավոր միջոցներով պայքարելու ենք` վերականգնելու հայրենազրկության այս քստմնելի արշավի դեմ»,- ասված է հաղորդագրությունում:

Կոմիտեից ընդգծել են, որ իրենց պայքարը պետք է ավելի ուժեղանա, մինչև ազգային և իրավական պետության վերականգնումը, այն է` երկրի իշխանությունների հեռացումը:
Մասիս Աբրահամյանի մասին գրառում է արել իրավապաշտպան Ռուբեն Մելիքյանը։
«Պարոն Աբրահամյանին անձամբ եմ ճանաչում. նա մեծապես օգնել է Արցախի Մարդու իրավունքների պաշտպանի հաստատությանը 2016-2018 թվականներին, երբ այդ կառույցը ես էի ղեկավարում։ Պարոն Աբրահամյանն ինձ առաջարկել է ստանձնել իր շահերի պաշտպանությունը նրա նկատմամբ դրսևորված այդ կամայականությունը վիճարկելու հարցում, և ես իհարկե ընդունել եմ այդ առաջարկը»,- ֆեյսբուքյան իր էջում գրել է նա։
Հիշեցնենք` Սյունեն հուլիսի 31-ին տեսանյութ էր հրապարակել ֆեյսբուքյան իր էջում ու հայտնել, որ առանց որևէ բացատրության իրեն 12 ժամ պահել են օդանավակայանում, ինչից հետո տեղեկացրել են, որ չի կարող Հայաստան մուտք գործել, քանի որ անցանկալի անձ է ու պետք է վերադառնա Նիդեռլանդներ։
Շաբաթներ առաջ էլ արգելվել էր ՀՅԴ բյուրոյի անդամ, Ֆրանսիայի հայկական կազմակերպությունների համակարգող խորհրդի (CCAF) համանախագահ Մուրադ Փափազյանի մուտքը Հայաստան։ Նա հայտարարություն էր տարածել, որում նշել էր, որ պատրաստվում է պայքարել Հայաստան վերադառնալու համար։
Փափազյանին վարչապետի գրասենյակից բացատրել էին, որ իր մուտքի արգելքի պատճառը 2021-ի հունիսի 1-ին Փարիզում Նիկոլ Փաշինյանի դեմ տեղի ունեցած բողոքի ցույցին մասնակցելն ու այդ ցույցը կազմակերպելն է:
Լրահոս
0