ԵԱՏՄ քանի՞ քաղաքացի է դիմել ՀՀ քաղաքացիություն ստանալու համար

Բաժանորդագրվեք
Yandex newsTelegram
Հունիսի 1-ից հուլիսի 19-ն ընկած ժամանակահատվածում ՀՀ ոստիկանության անձնագրային և վիզաների վարչության ծանրաբեռնվածությունն ավելացել է ավելի քան 60 տոկոսով:
ԵՐԵՎԱՆ, 2 օգոստոսի – Sputnik. Այս տարվա փետրվար-հունիս ժամանակահատվածում Ռուսաստանի Դաշնության շուրջ 6,5 հազար քաղաքացի է հայկական անձնագիր ստացել: Տեղեկությունը Sputnik Արմենիային հայտնեցին ՀՀ ոստիկանության հասարակայնության հետ կապի և լրատվության վարչությունից` պատասխանելով մեր գրավոր հարցմանը։
Եթե ՌԴ քաղաքացիները փետրվարին 267 դիմում են ներկայացրել ՀՀ քաղաքացիություն ստանալու համար, մարտին` 1034, ապրիլին` 1576, մայիսին` 1712, ապա հունիսին դիմողների թիվը հասել է 1889-ի։
Բացի այդ, նշված ժամանակահատվածում ՀՀ քաղաքացիություն ստանալու համար դիմել են Բելառուսի 44 և Ղազախստանի 8 քաղաքացիներ: Ղրղզստանի որևէ քաղաքացի փետրվար-հունիս ժամանակահատվածում ՀՀ քաղաքացիություն չի ստացել։
Ավելի վաղ ոստիկանությունը հայտնել է, որ ՀՀ ոստիկանության անձնագրային և վիզաների վարչության ծանրաբեռնվածությունը այս տարվա հունիսի 1-ից հուլիսի 19-ն ընկած ժամանակահատվածում նախորդ տարվա համեմատ աճել է ավելի քան 60 տոկոսով: Եթե 2021 թվականի հունիսի 1-ից հուլիսի 19-ը վարչությունը սպասարկել է 206 318 անձի, ապա 2022 թվականի նույն ժամանակահատվածում՝ 337 848 անձի։
Ավելացել է ՀՀ քաղաքացիության ստանալու դիմումների թիվը՝ 1 191-ից հասնելով 3 759-ի, մշտական բնակության համար դիմումների թիվը 28 635-ից հասել է 35 354-ի։ Ամենամեծ աճը կապված է հանրային ծառայությունների համարանիշ (որը փոխարինում է սոցիալական քարտին) ստանալու հետ՝ 28 638-ից մինչև 105 599, այսինքն` թիվն ավելացել է 76 961-ով:
Լրահոս
0