Վիտալի Բալասանյանի դեմ իրականացվում է կազմակերպված արշավ․ Արցախի ԱԽ գրասենյակ

© SputnikՎիտալի Բալասանյան
Վիտալի Բալասանյան - Sputnik Արմենիա, 1920, 26.08.2022
Վիտալի Բալասանյան. Արխիվային լուսանկար
Բաժանորդագրվեք
НовостиTelegram
Արցախի ԱԽ գրասենյակն անդրադարձել է համացանցում շրջանառվող լուսանկարին` հերքելով լուրերը, թե Բալասանյանը «Բերձորի հանձնում-ընդունում» է արել։
ԵՐԵՎԱՆ, 26 օգոստոսի – Sputnik. Արցախի անվտանգության խորհրդի քարտուղար Վիտալի Բալասանյանի դեմ իրականացվում է կազմակերպված արշավ՝ նպատակ ունենալով փորձել վարկաբեկել Արցախի պաշտպանության և պետականության ամրապնդման գործում անուրանալի ավանդ ունեցող գործչի անունը։ Նման հայտարարությամբ է հանդես եկել Արցախի անվտանգության խորհուրդը։
Նշենք, որ համացանցում լուսանկար է տարածվել, թե ինչպես է Վիտալի Բալասանյանը ձեռքսեղմումով դիմավորում ադրբեջանցի պաշտոնյային և «Բերձորի հանձնում-ընդունումն անում»:
«Բալասանյանն աշխատանքի բերումով մշտապես այցելում է Արցախի տարբեր բնակավայրեր, զբաղվում անվտանգային խնդիրներով, իրականացնում պաշտոնեական գործառույթները։ Շրջանառվող լուսանկարն արվել է անհայտ անձի կողմից, երբ Բալասանյանը հերթական աշխատանքային այցով գտնվել է ռուսական խաղաղապահ զորքերի հենակետերից մեկում։ Հենակետը տեղակայված է Արցախի Ստեփանակերտ-Գորիս միջպետական մայրուղու Շուշի քաղաքին կից գտնվող հատվածում»,–ասված է հաղորդագրության մեջ։
Նշվում է նաև, որ այդ ժամանակ Բալասանյանը զբաղվել է Արցախը ՀՀ–ին կապող նոր երթուղու գործարկման հետ կապված անվտանգային խնդիրներով։
Արցախի ԱԽ–ն հայտարարում է, որ Բալասանյանն իր կենսագրության ընթացքում երբևէ չի զբաղվել հայ ժողովրդի շահերին հակասող գործունեությամբ։ Ուստի, հորդորում են դադարեցնել անպատասխանատու ասեկոսեներ շրջանառելը։
Հիշեցնենք` օգոստոսի 5-ին հայտնի դարձավ, որ Արցախի տարածքային կառավարման և ենթակառուցվածքների նախարար Հայկ Խանումյանը Քաշաթաղի շրջանի Աղավնո գյուղում տեղի բնակչության, համայնքի և շրջանի իշխանության ներկայացուցիչների հետ քննարկել է Աղավնոյի, Ներքին Սուսի և Բերձորի բնակչության՝ մինչև սույն թվականի օգոստոսի 25-ը տարհանման հարցերը։
Դրանից մեկ օր առաջ` օգոստոսի 4-ին, ՀՀ տարածքային կառավարման և ենթակառուցվածքների նախարար Գնել Սանոսյանը հայտնել էր, որ Լաչինի միջանցք կոչվող ճանապարհի այլընտրանքային հատվածի կառուցման աշխատանքներն արդեն սկսվել են ու մինչև գարուն կավարտվեն։
Նշենք, որ 2020 թվականի նոյեմբերի 9-ի եռակողմ հայտարարության 6-րդ կետում ասվում է, որ երեք տարում Արցախը Հայաստանի հետ կապող նոր ճանապարհի նախագիծ է լինելու։
Լրահոս
0