ԱՄՆ Կոնգրեսը խստորեն դատապարտում է ՀՀ–ի նկատմամբ ադրբեջանական կողմի հարձակումները. Փելոսի

© Sputnik / Asatur YesayantsԱսուլիսի ժամանակ
Ասուլիսի ժամանակ - Sputnik Արմենիա, 1920, 18.09.2022
Ասուլիսի ժամանակ
Բաժանորդագրվեք
НовостиTelegram
Փելոսիի խոսքով` հանդիպումների ընթացքում մշտապես թիրախավորվում են անվտանգության հարցերը։
ԵՐԵՎԱՆ, 18 սեպտեմբերի – Sputnik. ՀՀ ԱԺ նախագահը և ԱՄՆ Ներկայացուցիչների պալատի խոսնակը հանդիպման ընթացքում վերահաստատել են ԱՄՆ Կոնգրեսի հանձնառությունը Հայաստանում և տարածաշրջանում անվտանգային, տնտեսական, ժողովրդագրական հարցերում։
Այս մասին ՀՀ ԱԺ նախագահ Ալեն Սիմոնյանի հետ կայացած համատեղ մամուլի ասուլիսի ժամանակ ասաց ԱՄՆ Ներկայացուցիչների պալատի խոսնակ Նենսի Փելոսին։
Չգիտեինք, որ մեր այցը կհամընկնի ռազմական գործողություններին հաջորդող օրերին. Նենսի Փելոսի
«Այս տարի ավելի վաղ Միացյալ Նահանգներում ընդունել ենք ձեզ և քննարկել ենք Հայաստանում ժողովրդավարությանը, անվտանգությանն առնչվող հարցեր։ Մենք արդյունավետ հանդիպում ունեցանք նաև այստեղ, վերահաստատեցինք ԱՄՆ Կոնգրեսի հանձնառությունը անվտանգային, տնտեսական, ժողովրդագրական հարցերում Հայաստանում և տարածաշրջանում»,– նշեց Փելոսին։
Նրա խոսքով` հանդիպումների ընթացքում մշտապես թիրախավորվում են անվտանգության հարցերը։ Փելոսին շեշտեց` Հայաստանն ԱՄՆ–ի համար կարևոր նշանակություն ունի, ու ԱՄՆ Կոնգրեսը խստորեն դատապարտում է Հայաստանի նկատմամբ ադրբեջանական կողմի հարձակումները։
«Մենք շարունակում ենք հետևել իրադարձություններին և ցանկանում ենք ձգտել, որպեսզի բանակցային խաղաղ և տևական լուծում լինի Լեռնային Ղարաբաղի հակամարտության հարցում»,– ասաց Փելոսին։
Ալեն Սիմոնյանն էլ նշեց, որ շատ կարևոր է այս ծանրագույն շրջանում Փելոսիի այցը Հայաստան։
«Տիկին Փելոսիին ներկայացրել եմ, որ սեպտեմբերի 13-ից Ադրբեջանը Հայաստանի ինքնիշխան տարածքի նկատմամբ ագրեսիայի նոր փուլ է սկսել, ինչպես նաև դաժան ռմբակոծությունների ենթարկել հայկական դիրքերը և բնակավայրերն ու քաղաքացիական ենթակառուցվածքներ»,– նշեց Սիմոնյանը։
Նա երախտագիտություն հայտնեց սեպտեմբերի 14-ի երեկոյան Միացյալ Նահանգների միջնորդությամբ ձեռք բերված զինադադարի համաձայնության համար։
Հիշեցնենք, որ այսօր առավոտյան Նենսի Փելոսին այցելել է Ծիծեռնակաբերդ ու Հայոց ցեղասպանության թանգարան։
Նշենք, որ Փելոսին Երևանում է պաշտոնական այցով։ Նա առաջին անգամ է Հայաստանում։ Ներկայացուցիչների պալատի խոսնակին ուղեկցում են ԱՄՆ Ներկայացուցիչների պալատի էներգետիկ և կոմերցիոն հարցերով հանձնաժողովի նախագահ Ֆրանկ Փալոնեն, ներկայացուցիչների պալատի անդամներ Աննա Էշուն և Ջեքի Սփիերը:
Երկօրյա այցով Հայաստան ժամանած ամերիկացի հյուրերն ընդլայնված կազմով հանդիպում են ունեցել Ազգային ժողովում։ Նախատեսվում է նաև հանդիպում լրատվամիջոցների և քաղաքացիական հասարակության ներկայացուցիչների, բարձրաստիճան պաշտոնյաների հետ հետ։
Լրահոս
0