Հայաստանը ՀԱՊԿ-ից ակնկալում է հստակ գործողություններ. Գևորգյանը` Զասին

© Sputnik / Aram Nersesyan ՀԱՊԿ առաքելության ղեկավար Ստանիսլավ Զասը
 ՀԱՊԿ առաքելության ղեկավար Ստանիսլավ Զասը - Sputnik Արմենիա, 1920, 23.09.2022
ՀԱՊԿ առաքելության ղեկավար Ստանիսլավ Զասը. Արխիվային լուսանկար
Բաժանորդագրվեք
НовостиTelegram
Զրուցակիցները քննարկել են այն հավաքական քայլերը, որոնք ուղղված են Ադրբեջանի ագրեսիայի հետևանքով ստեղծված իրավիճակը հաղթահարելուն։
ԵՐԵՎԱՆ, 23 սեպտեմբերի – Sputnik․ Հայաստանը ՀԱՊԿ-ից ակնկալում է հստակ գործողություններ։ Այս մասին ասել է ՀՀ ԱԳ փոխնախարար, ԱԳ նախարարի պարտականությունները կատարող Վահե Գևորգյանը ՀԱՊԿ գլխավոր քարտուղար, Հայաստանում ՀԱՊԿ առաքելության ղեկավար Ստանիսլավ Զասի հետ հանդիպման ժամանակ։ Տեղեկությունը հայտնում է ԱԳՆ մամուլի ծառայությունը։
«ՀՀ ԱԳ նախարարի տեղակալը նշել է, որ հայկական կողմը ՀԱՊԿ-ից ակնկալում է հստակ գործողություններ` ՀԱՊԿ անդամ Հայաստանի տարածքային ամբողջականության վերականգնման և նոր սրացումների կանխարգելման ուղղությամբ»,- նշված է հաղորդագրության մեջ։
Հանդիպման ընթացքում քննարկվել է Ադրբեջանի կողմից ՀՀ ինքնիշխան տարածքի նկատմամբ իրականացվող ագրեսիայի հետևանքով ստեղծված իրավիճակը։ Պաշտոնյաները խոսել են հավաքական քայլերի մասին, որոնք ուղղված են իրավիճակը հաղթահարելուն։
Հիշեցնենք՝ ՀԱՊԿ-ի առաքելությունը՝ կազմակերպության գլխավոր քարտուղարի գլխավորությամբ, սեպտեմբերի 13-ին ժամանել է Հայաստան՝ ՀԱՊԿ-ի Հավաքական անվտանգության խորհրդի արտահերթ նիստի որոշման համաձայն: Առաքելության կազմում ընդգրկված են ՀԱՊԿ անդամ պետությունների ներկայացուցիչները, որոնք կազմակերպության աշխատանքային մարմինների աշխատակիցներ են:
Առաքելության վրա դրված են ստեղծված իրավիճակի գնահատման, տարածաշրջանում իրավիճակի վերաբերյալ ՀԱՊԿ անդամ պետությունների ղեկավարներին հանգամանալից զեկույց պատրաստելու և Հայաստանի ու Ադրբեջանի սահմանին առանձին շրջաններում առաջացած լարվածության դեէսկալացիայի վերաբերյալ առաջարկությունների մշակման խնդիրներ:
Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որն ադրբեջանցիներն առաջին անգամ խախտեցին սեպտեմբերի 20–ին` կրակելով Սյունիքի մարզի Ներքին Հանդի ուղղությամբ։
Լրահոս
0