Կրակը դադարել է, կրակի հավանականությունը` ոչ. ՊՆ–ն սահմանից տեսանյութ է հրապարակել

Բաժանորդագրվեք
НовостиTelegram
Տղաներն ամենամեծ դասը ստացել են հենց հակառակորդին ոչնչացնելիս` մարտի դաշտում, կամ դու ես խփում, կամ քեզ են շարքից հանում։
ԵՐԵՎԱՆ, 3 հոկտեմբերի – Sputnik. Հրետանային դիվիզիոնն արդեն շաբաթներ շարունակ մարտական հերթապահություն է իրականացնում ՀՀ սահմանային դիրքերից մեկում` պատրաստ շարքից հանելու գրոհող խմբերին ու նրանց ենթակառուցվածքները։ Պաշտպանության նախարարությունը սահմանից տեսանյութ է հրապարակել «Ֆեյսբուքի» էջում։
Նշվում է` կրակը դադարել է, կրակի հավանականությունը` ոչ։
Հարաբերական խաղաղության պայմաններում հայկական բանակն ամենօրյա դասեր, մարզումներ, ստուգումներ, տեխնիկայի սպասարկում, նշանակետերի ճշգրտում է իրականացնում։
Դիվիզիոնի հրամանատար Արտուշ Հովհաննիսյանը նշում է, որ հրետանային դիվիզիոնի ջամկետային զինծառայողների համար շաբաթներ առաջ առաջին իրական մարտերն են եղել, կրակային ելույթները, ընդ որում հակառակորդի անօդաչուների ակնհայտ ներկայությամբ։
Դասակի հրամանտար Արման Պետրոսյանն էլ ընդգծում է` ժամկետայինների համար անծանոթ է եղել հրանոթի կրակոցի ձայնը, արկերի պայթյունը, ինչը րոպեներ անց դարձել է սովորական։
«Առաջին օրը հակահարված տվեցինք հակառակորդին, նրանց հետ մղեցինք իրենց դիրքերից։ Մարտական գործողությունների հաջորդ օրը զոհ ու վիրավոր ունեցանք, մեր զինակից ընկերներն էին։ Վիրավոր զինակից ընկերս այս պահին ապաքինվում է»,– ասում է ժամկետային զինծառայող Նորայր Հայրապետյանը։
Մեկ այլ ժամկետային զինծառայող Հրաչ Սարգսյանն էլ նշում է, որ իրենց կողքին արկեր են պայթել, սակայն իրենք ուշադրություն են դարձրել միայն գործողությունների ճիշտ կատարմանը։ Նրա խոսքով` յուրաքանչյուրն իմացել է իր առջև դրված խնդիրն ու կատարել այն հնարավորինս ճշգրիտ։
Հակառակորդն իր հարձակման ամբողջ ընթացքում նկատել է, որ ինտենսիվ հարվածներ ստացել է հենց այդ ուղղությամբ տեղակայված հրետանային միավորներից և ուշադրությունը կենտրոնացրել է հարվածային զենքերը չեզոքացնելու վրա։
Տղաներն ամենամեծ դասը ստացել են հենց հակառակորդին ոչնչացնելիս` մարտի դաշտում, կամ դու ես խփում, կամ քեզ են շարքից հանում։
Ջերմուկի հարակից սարերի ուղղությամբ Ադրբեջանը պարբերաբար հրետանի է կիրառում
ՊՆ–ից հայտնում են` մարտական առաջադրանքները կատարվել են դիպուկ և ժամանակին նաև դիվիզիոնի կապավորների մասնագիտական որակների շնորհիվ։
«Զինված ուժերում սա այն զորատեսակն է, որ կապն առանձնահատուկ տեղ է գրավում, քանի որ հենց դրա միջոցով են բոլոր նշանակետերը տրվում հրամանատարական կետ, այնուհետև փոխանցվում է մարտկոցներին։ Ամեն վայրկյան և ամեն րոպե մենք մեծ ուշադրություն ենք դարձնում կապին, որպեսզի որևէ թերություն չլինի»,– ասում է դիվիզիոնի կապի պետ Սերգեյ Բերբերյանը։
Մարտական գործողությունների ժամանակ Արման Ծատուրյանն է զոհվել, սակայն մղած պայքարի ժամանակ ռեկորդ է սահմանել. հաշվարկի պատրաստվածության շնորհիվ Ծատուրյանը կարողացել է 1 րոպեում մինչև 8 արկ կրակել։
Լրահոս
0