Եվրամիությունը հաստատել է հակառուսական պատժամիջոցների ութերորդ փաթեթը
14:59 06.10.2022 (Թարմացված է: 15:02 06.10.2022)
Բաժանորդագրվել
Հետաքրքիր է, որ Եվրահանձնաժողովը որոշել է պատժամիջոցները տարածել Խերսոնի և Զապորոժիեի մարզերի` Ուկրաինայի կողմից չվերահսկվող մասերի վրա։
ԵՐԵՎԱՆ, 6 հոկտեմբերի – Sputnik. Եվրահանձնաժողովը հայտնում է, որ Եվրամիության երկրները հաստատել են Ռուսաստանի դեմ պատժամիջոցների ութերորդ փաթեթը: Համապատասխան որոշումը հրապարակվել է ԵՄ-ի կայքում։
Պատժամիջոցների նոր փաթեթով սահմանվում է.
երրորդ երկրներ ռուսական նավթ տեղափոխելու արգելք, եթե դրա գինը սահմանված առավելագույն նիշից բարձր է,
ածուխի արտահանման արգելք, ներառյալ կոքսացող ածուխը, որոշ էլեկտրոնային բաղադրիչների արտահանման արգելք, որոնք կարող են օգտագործվել ռուսական զենքի մեջ, ավիաոլորտի տեխնիկական արտադրանքի, որոշ քիմիական նյութերի, հրաձգային զենքի արտահանման արգելք,
փայտանյութի զանգվածի, թղթի, ծխախոտի, պլաստմասսայի, կոսմետիկայի, ոսկերչական արդյունաբերության համար նյութերի (թանկարժեք քարեր և մետաղներ), տեքստիլի, կոշիկի, կաշվի, խեցեղենի ներմուծման արգելք (ներմուծման սահմանափակումները կազդեն գրեթե 7 մլրդ եվրոյի արտադրանքի վրա)։
երկարաձգվել է ՌԴ-ից պողպատե արտադրանքի ներմուծման արգելքը,
հանրաքվեների կազմակերպմանը մասնակից ֆիզիկական և իրավաբանական անձանց, ինչպես նաև պաշտպանական արդյունաբերության ներկայացուցիչների և «ապատեղեկատվություն տարածող անձանց» դեմ սահմանափակումներ,
ԵՄ քաղաքացիների համար՝ պետության վերահսկողության տակ գտնվող որոշ կազմակերպություններում ղեկավար պաշտոններ զբաղեցնելու արգելք, ՌԴ քաղաքացիների և ռեզիդենտների կրիպտոակտիվների սպասարկման արգելք,
ռուսական ՏՏ ընկերություններին ինժեներական և իրավաբանական ծառայություններ մատուցելու արգելք,
«Նավագնացության ռուսական ծովային ռեգիստրի» հետ գործառնությունների արգելք:
Հետաքրքիր է, որ Եվրահանձնաժողովը որոշել է պատժամիջոցների գործողությունը տարածել Խերսոնի և Զապորոժիեի մարզերի՝ Ուկրաինայի կողմից չվերահսկվող մասերի վրա։
Հիշեցնենք` Արևմուտքը Ռուսաստանի նկատմամբ պատժամիջոցային ճնշումն ուժեղացրեց Ուկրաինայի պատճառով, ինչը հանգեցրեց Եվրոպայում և ԱՄՆ-ում էլեկտրաէներգիայի, վառելիքի և սննդամթերքի գների աճի։
