Фон для радио  - Sputnik Արմենիա, 1920
ՌԱԴԻՈ

Ձրի պանիրը լինում է միայն թակարդում. զգուշացե՛ք կասկածելի հավելվածներ ներբեռնելուց

Պապյան. Աղմկոտ հավելվածը ֆինանսական բուրգի սկզբունքով աշխատող ինչ–որ խաբեության սխեմա է
Բաժանորդագրվեք
НовостиTelegram
Մեդիափորձագետ Արթուր Պապյանը Sputnik Արմենիայի եթերում անդրադարձել է տեղեկատվությանը, ըստ որի` բջջային հեռախոսներում վերջին օրերին տարածվող հավելվածներից մեկը, ըստ հնչող գնահատականների, լրտեսական վիրուսի նման մի ծրագիր է։
Վերջին օրերին քննարկվող և բջջային հեռախոսներով տարածվող աղմկոտ հավելվածն առաջին հայացքից ֆինանսական բուրգի սկզբունքով աշխատող ինչ–որ խաբեության սխեմա է և իրենից շատ լուրջ վտանգ չի ներկայացնում, թեև այդ հավելվածի վերջնական ուսումնասիրությունը դեռ երկար կտևի։ Sputnik Արմենիայի հետ զրույցում նման կարծիք հայտնեց մեդիափորձագետ Արթուր Պապյանը։
Տեղեկատվական անվտանգության փորձագետ Սամվել Մարտիրոսյանն իր ֆեյսբուքյան էջում գրել էր, որ վերջին օրերին տարածվում է հավելված, որը թույլ է տալիս մտնել մի ծրագրի մեջ, որտեղ տեսանյութեր նայելու դիմաց գումար են վճարում` կրիպտոյով։ Ըստ նրա` ծրագիրը, ընկնելով հեռախոսի մեջ, ստանում է մեծ քանակի թույլտվություններ, և մի օր կարող է չար խաղեր խաղալ օգտատիրոջ հետ։
Պապյանն իր հերթին տեղեկացրեց, որ իրենց լաբորատորիայում շարունակելու են վերոհիշյալ հավելվածի ուսումնասիրությունը։ Նրա պնդմամբ` երբ խոսքը վերաբերում է ինտերնետով գումարներ շահելուն, ստանալուն, հեշտությամբ աշխատելուն, ապա պետք է միշտ հիշել, որ անվճար պանիրը լինում է միայն թակարդում։
«Առհասարակ որևէ մեկին խորհուրդ չէի տա անհայտ աղբյուրներից վերցնել ու հեռախոսներում զետեղել հավելվածներ, իսկ տեղադրելուց էլ միշտ անհրաժեշտ է գոնե նախապես մտնել տվյալ հավելվածի նախընտրանքների բաժին ու տեսնել, թե ինքն ինչպիսի թույլտվություններ է պահանջում օգտատիրոջից, որովհետև անդրոիդի և այֆոնի դեպքում հանարավոր է մտնել նախընտրանքների բաժին ու կետ առ կետ արգելափակել հասանելիությունը հեռախոսի միկրոֆոնին, տեսախցիկին, ֆայլեր գրելու հնարավորություններին»,– ասաց մեդիափորձագետը։
Պապյանի կարծիքով` ցանկալի չէ, որ մարդիկ հասնեն այն կետին, երբ հավելվածն իրենց մոտ տեղադրեն ու դեռ մի բան էլ մտածեն` այն վիրո՞ւս է, թե՞ ոչ, քանզի տվյալ դեպքում առաջին հայացքից ակնառու է ֆինանսական մեքենայությունների սխեմայի առկայությունը։ Ըստ նրա` կարող են լինել նաև հավելյալ ռիսկեր, որոնց դեպքում պետք է իրականացվի համարժեք ուսումնասիրություն։
ՀՀ–ում ազգային անվտանգության խնդիր կա. «Pegasus»–ով «վարակվելու» նոր դեպքեր են բացահայտվել
«Աղմուկ հանած հավելվածն ունի URSCG անվանում, բացվում է շատ կասկածելի հղումով ու դրան կից ֆեյսբուքյան էջի միջոցով։ Նույնիսկ անհասկանալի է, թե ինչու պետք է որևէ անձ համաձայնվի իր հեռախոսում տեղադրել շատ կասկածելի հավելված։ Անգամ եթե ինչ–որ մեկն այդ հավելվածը պատրաստում է, օրինակ, Ադրբեջանում, միևնույն է, ամեն ինչ անելու է իր ինքնությունը թաքցնելու համար, և այդ նպատակով կարող է օգտագործել անհասկանալի հասցեներ։ Նման ոլորտում, երբ գործ ունենք ակնհայտ խաբեության կամ կիբեռհանցագործության հետ, ապա միանշանակ է, որ առանց լուրջ ու հիմնավոր ուսումնասիրության հստակ դատողություններ անել հնարավոր չէ»,– նշեց մեր զրուցակիցը։
Պապյանը գոհունակությամբ տեղեկացրեց, որ տարբեր տարիքի բազմաթիվ օգտատերեր կասկածելի հավելվածների հանդիպելիս զանգահարում են իրեն կամ Սամվել Մարտիրոսյանին, խոսում են այդ մասին, ինչը վկայում է շատ քաղաքացիների կողմից խնդրին զգուշավոր և լուրջ մոտեցում ցուցաբերելու մասին։
Լրահոս
0