Ի՞նչ օգնություն էր առաջարկում ՀԱՊԿ–ը Հայաստանին. Զասի պատասխանը

© Photo : official site of the Prime Minister of RAՍտանիսլավ Զասն ու Նիկոլ Փաշինյանը
Ստանիսլավ Զասն ու Նիկոլ Փաշինյանը - Sputnik Արմենիա, 1920, 19.12.2022
Ստանիսլավ Զասն ու Նիկոլ Փաշինյանը
Բաժանորդագրվեք
НовостиTelegram
Հայկական կողմը տեխնիկայի, սպառազինության և ռազմատեխնիկական գույքի առաջնահերթ կարիքների մասին տվյալներ է փոխանցել ՀԱՊԿ–ին:
ԵՐԵՎԱՆ, 19 դեկտեմբերի – Sputnik. Հայաստանին օգնություն տրամադրելու որոշման նախագծում կար մի կետ, որով նախատեսվում էր Հայաստանին ռազմատեխնիկական օգնություն ցուցաբերել։ Sputnik Արմենիա մուլտիմեդիոն մամուլի կենտրոնում Մոսկվա–Աստանա–Բիշքեկ–Երևան–Մինսկ տեսակապի միջոցով կայացած ասուլիսի ժամանակ ասաց ՀԱՊԿ գլխավոր քարտուղար Ստանիսլավ Զասը` պատասխանելով Sputnik Արմենիայի հարցին։
Զասին հիշեցրին, որ Հայաստանի արտգործնախարարը վերջերս հայտարարել էր, թե Երևանում ՀԱՊԿ գագաթնաժողովի ժամանակ քննարկվող փաստաթղթերը ենթադրում էին նաև ռազմատեխնիկական օգնություն, և հարցրին` կարո՞ղ է արդյոք բացել փակագծերը:
«Մանրամասները չեմ կարող բացահայտել, քանի որ առաջարկվող օգնության մասին որոշման նախագիծը գաղտնի է։ Բայց ասեմ, որ իսկապես եղել է կետ, որը նախատեսում էր Հայաստանին ռազմատեխնիկական օգնություն տրամադրել։ Ցուցակ, իհարկե, չկար, թեև հայկական կողմը ՀԱՊԿ–ին տվյալներ էր փոխանցել սպառազինության և ռազմական տեխնիկայի առաջնահերթ կարիքների մասին։ Իսկ տրամադրման պայմանները տարբեր էին՝ ինչ-որ բան` որպես օգնություն, ինչ-որ բան` ներքին գներով»,–ասաց նա։
Դա, ըստ նրա, չի նշանակում, որ փաստաթղթի ստորագրման հաջորդ օրը ինքնաթիռներ կժամանեին Հայաստանի համար անհրաժեշտ ամեն ինչով։ Բայց դա հնարավորություն կտար ՀԱՊԿ երկրների պաշտպանության նախարարություններին աշխատել այդ ցանկով և ռազմատեխնիկական օգնություն ցուցաբերել։
Հիշեցնենք` նոյեմբերի 23-ին ՀԱՊԿ գագաթնաժողովում ՀՀ վարչապետ Նիկոլ Փաշինյանը հայտարարեց, որ չի ստորագրել «ՀԱՊԿ Հավաքական անվտանգության խորհրդի հռչակագրի և Հայաստանի Հանրապետությանը օժանդակություն ցուցաբերելու համատեղ միջոցառումների մասին» նախագիծը, քանի որ այն բավականաչափ վերջնական տեսքի չի բերվել։ ՀԱՊԿ–ի գլխավոր քարտուղար Ստանիսլավ Զասն ավելի ուշ ասաց, որ կազմակերպության կողմից որպես օգնություն Հայաստանին առաջարկվել են և՛ քաղաքական-դիվանագիտական, և՛ ռազմական միջոցառումներ, այդ թվում՝ առաքելության ուղարկում հայ-ադրբեջանական սահման (որտեղ սեպտեմբերի 13-ին Ադրբեջանը լայնածավալ ագրեսիա էր սկսել ՀՀ ինքնիշխան տարածքի նկատմամբ. խմբ.)։
Լրահոս
0