Фон для радио  - Sputnik Արմենիա, 1920
ՌԱԴԻՈ

ԱՄՆ–ն ու ՆԱՏՕ–ն Թուրքիայի դեմ կտրուկ քայլերի չեն դիմի. քաղաքագետն ասել է` ինչու

ԱՄՆ–ն ու ՆԱՏՕ–ն Թուրքիայի դեմ կտրուկ քայլերի չեն դիմի. քաղաքագետ
Բաժանորդագրվեք
НовостиTelegram
Քաղաքագետ, ԵՊՀ Միջազգային հարաբերությունների ֆակուլտետի քաղաքական ինստիտուտների և գործընթացների ամբիոնի վարիչ Գարիկ Քեռյանը Sputnik Արմենիայի եթերում անդրադարձել է ՆԱՏՕ–ում Թուրքիայի անդամակցությունը կասկածի տակ դնելու կամ վերանայելու թեմային։
Միացյալ Նահանգները դիվանագիտական ճնշում է գործադրում Թուրքիայի վրա, որովհետև վերջինս չի միացել ՆԱՏՕ–ի հետ հակամարտության մեջ գտնվող Ռուսաստանի դեմ ուղղված արևմտյան պատժամիջոցներին։ Sputnik Արմենիայի հետ զրույցում նման կարծիք հայտնեց քաղաքագետ Գարիկ Քեռյանը։
Հայտնել ենք, որ ԱՄՆ 45-րդ նախագահ Դոնալդ Թրամփի ազգային անվտանգության նախկին խորհրդական Ջոն Բոլթոնը հայտարարել է, թե 2023 թվականին Թուրքիայի անդամակցությունը ՆԱՏՕ-ին կարող է հարցականի տակ դրվել, քանի որ Ուկրաինայի հակամարտության ֆոնին թուրքական իշխանությունները չեն ցանկանում կոշտ հակառուսական դիրքորոշում ունենալ։
«Թուրքիան այժմ Ռուսաստանի աջակցությամբ վերածվում է էներգետիկ և հացահատիկային հաբի, ուստի նման պայմաններում Թուրքիային զսպելն ուղղակի դարձել է ԱՄՆ–ի ու նրա արևմտյան դաշնակիցների համար բավականին լուրջ խնդիր։ Թուրքիայի վրա ճնշում գործադրելով` փորձ է արվում նրան կտրել Ռուսաստանից և բերել արևմտյան համերաշխության գոտի։ Բայց եթե դիտարկենք Թուրքիայի գեոպոլիտիկ դիրքը, նրա բանակի ներուժը, դաշինքում հարավային թևը լինելու կարևորությունը, ապա անհնար է պատկերացնել, թե առանց այդ երկրի ՆԱՏՕ–ն ինչի կվերածվի»,– ասաց քաղաքագետը։
Քեռյանի կարծիքով` Հյուսիսատլանտյան դաշինքն առանց Թուրքիայի պարզապես կլինի խոցելի կառույց և չի ունենա լուրջ ազդեցության լծակներ Մերձավոր Արևելքում, Բալկաններում և ընդհանրապես հարավասիական ուղղությամբ ռազմավարական պլանների իրականացման գործընթացում։ Ըստ նրա` Արևմուտքն իր ամբողջ գործակալական ցանցով ու մեդիառեսուրսներով ամեն կերպ 2023 թվականին փորձելու է հակազդել Թուրքիային, որովհետև Ռուսաստանի հետ այդ երկրի համագործակցությունը բավականին լուրջ խնդիրների առջև է կանգնեցնում Հյուսիսատլանտյան դաշինքին։
Թուրքիայի և Ֆինլանդիայի արտգործնախարարները քննարկել են ՆԱՏՕ-ի ընդլայնման հարցը
Քաղաքագետի դիտարկմամբ` Արևմուտքին այլ ելք չի մնում, քան սանձել Էրդողանին։
Անդրադառնալով այն հարցին, թե ինչու է Թուրքիայի հետագա անդամակցությունը ՆԱՏՕ–ում կասկածի տակ դնելու մասին հայտարարում Ջոն Բոլթոնը, այլ ոչ թե դաշինքի գլխավոր քարտուղար Յենս Ստոլտենբերգը, մեր զրուցակիցն ընդգծեց, որ ԱՄՆ–ի նախագահի ազգային անվտանգության հարցերով նախկին խորհրդականը շատ կարևոր անձնավորություն է և տիրապետում է բավականին լուրջ տեղեկատվության, հետևաբար նրա ասածներն անտեսելն ուղղակի անմտություն կլինի։
Պատասխանելով այն հարցին, թե արդյոք հեշտ կլինի Թուրքիայի անդամակցության կասեցումը վերոհիշյալ դաշինքին, Քեռյանն ասաց, որ Արևմուտքն, այդուհանդերձ, Անկարայի պարագայում կտրուկ քայլերի չի դիմի, որովհետև Հյուսիսատլանտյան դաշինքում հստակ հասկանում են, որ տվյալ կառույցն առանց Թուրքիայի Մերձավոր Արևելքում կվերածվի թղթե օդապարիկի։
«Թեև պաշտոնական Անկարան արդեն զզվեցրել է արևմտյան դաշնակիցներին, և այդ մասին Բոլթոնից առաջ հայտարարել են ուրիշները, բայցևայնպես, այժմ շատ դժվար է դաշինքում Թուրքիայի առումով կողմնորոշվել, թե ով ում բարեկամն է, հետևաբար ամեն ինչ չէ, որ այնտեղ հստակ է, առավել ևս, որ ռուս–ուկրաինական հակամարտության համատեքստում կան նաև այլ երկրներ, որոնք երկմտում են` արժե՞ հետայսու վտանգել իրենց ռազմատնտեսական ռեսուրսները»,– ասաց Քեռյանը։
Հիշեցնենք, որ Թուրքիան ՆԱՏՕ-ին անդամակցում է 1952 թվականի փետրվարի 18-ից։ Դաշինքը ստեղծվել է դրանից երեք տարի առաջ։
ՆԱՏՕ-ի ղեկավարը խոստովանել է, որ Ուկրաինային աջակցելը թանկ է նստում եվրոպացիների վրա
Լրահոս
0