ՀՀ–ում և Կորեայում դիվանագիտական ներկայացուցչություններ կարող են բացվել. քննարկում է եղել
18:28 13.02.2023 (Թարմացված է: 18:29 13.02.2023)
© Photo : official site of the President of RAՎահագն Խաչատուրյանն ընդունել է Կորեայի Ազգային ժողովի Կորեա-Հայաստան բարեկամական խմբի ղեկավար Կիհուն Սոնի գլխավորած պատվիրակությանը
Վահագն Խաչատուրյանն ընդունել է Կորեայի Ազգային ժողովի Կորեա-Հայաստան բարեկամական խմբի ղեկավար Կիհուն Սոնի գլխավորած պատվիրակությանը
© Photo : official site of the President of RA
Բաժանորդագրվել
Կորեայի Ազգային ժողովի Կորեա-Հայաստան բարեկամական խմբի ղեկավարը ՀՀ նախագահի հետ հանդիպմանը կարևորել է Լաչինի միջանցքի բնականոն գործունեության վերականգնումը:
ԵՐԵՎԱՆ, 13 փետրվարի – Sputnik. Հայաստանի Հանրապետության նախագահ Վահագն Խաչատուրյանը Կորեայի Հանրապետության Ազգային ժողովի Կորեա-Հայաստան բարեկամական խմբի ղեկավար Կի Հուն Սոնի հետ քննարկել է երկու երկրում դիվանագիտական ներկայացուցչությունների բացման հնարավորությունները: Տեղեկությունը հայտնում է նախագահի մամուլի ծառայությունը։
© Photo : official site of the President of RAԿիհուն Սոնն ու Վահագն Խաչատուրյանը
Կիհուն Սոնն ու Վահագն Խաչատուրյանը
© Photo : official site of the President of RA
Հանդիպմանը մասնակցել են ՀՀ Ազգային ժողովի փոխնախագահ Ռուբեն Ռուբինյանը և ՀՀ ԱԺ Հայաստան-Կորեա բարեկամական խմբի ղեկավար Ծովինար Վարդանյանը:
«Հանդիպման ընթացքում քննարկվել են նաև բարձր տեխնոլոգիաների, մշակույթի և կրթության ոլորտներում փոխգործակցության զարգացման վերաբերյալ հարցերի լայն շրջանակ»,– ասված է հաղորդագրությունում։
Խաչատուրյանը կարևորել է նմանօրինակ այցելություններն ինչպես երկկողմ հարաբերությունների, այնպես էլ խորհրդարանական դիվանագիտության զարգացման տեսանկյուններից:
Կորեական պատվիրակության ղեկավարն էլ նշել է, որ հնարավոր ջանքերը գործադրելու է հայ-կորեական համագործակցության սերտացման համար:
Զրուցակիցներն անդրադարձել են նաև Հարավային Կովկասում տարածաշրջանային խնդիրներին: Խաչատուրյանն իր խոսքում ընդգծել է, որ Հայաստանը հավատարիմ է տարածաշրջանում կայուն և հարատև խաղաղության հաստատելու դիրքորոշմանը։ Նա շեշտել է, որ ակնկալում է գործընկեր երկրների աջակցությունն այս հարցում:
Կիհուն Սոնն իր խոսքում անդրադառնալով Լաչինի միջանցքի շրջափակմանը` նշել է, որ կարևորում է հումանիտար միջանցքի բնականոն գործունեության վերականգնումը: