Ինչպես դառնալ շան ընկերը. Երևանի դպրոցներից մեկում տրվեց ուսուցողական ծրագրի մեկնարկը
17:00 19.05.2023 (Թարմացված է: 17:21 19.05.2023)
Նալբանդյանի անվան դպրոցում
© Sputnik / Astghik Sukiasyan
Բաժանորդագրվել
Ուսումնասիրությունները ցույց է տալիս, որ շների կծման դեպքերի մեծ մասը երեխաների ոչ ճիշտ վարքի հետևանք է։ Ծրագրի նպատակն է բացառել սխալ շփումը կենդանիների հետ`նվազագույնի հասցնելով կծման դեպքերը։
ԵՐԵՎԱՆ, 19 մայիսի – Sputnik. Շների հետ վարվելու կանոնները պետք է իմանան բոլոր երեխաները, որպեսզի ոչ միայն խուսափեն անցանկալի դեպքերից, այլև պաշտպանեն թե՛ իրեն, թե՛ կենդանիներին։ Երևանի Միքայել Նալբանդյանի անվան թիվ 33 դպրոցում այսօր մեկնարկեց «Կենդանիների հետ վարվելու կանոնները» խորագրով ծրագիրը, որը նախաձեռնել է Երևանի քաղաքապետարանի ենթակայության տակ գտնվող «Կենդանիների խնամքի կենտրոն» ՀՈԱԿ-ը։
Դպրոցի 4–րդ և 5–րդ դասարանների աշակերտների հետ հանդիպման էր եկել «Կենդանիների խնամքի կենտրոն» ՀՈԱԿ-ի տնօրենի պաշտոնակատար Հարություն Առաքելյանը։ Նա երեխաներին պատմեց, թե ինչ չի կարելի անել, երբ շունը քնած է, ուտում է կամ խաղում։
Հարություն Առաքելյան
© Photo : press office of Yerevan municipality
Երեխաները շատ ակտիվ մասնակցում էին քննարկմանը։ Ոմանք պատմում էին իրենց շների մասին, ոմանք` շների հանդեպ վախի, մյուսները` շուն ունենալու անսահման ցանկության մասին։ Խոսվեց նաև շների հիվանդությունների, դրանց բուժման հնարավորությունների ու կենդանիների կլինիկաների մասին։ Երեխաները ստացան այն նվազագույն տեղեկությունները, որոնք անհրաժեշտ են կենդանիների պահման համար։
Հարություն Առաքելյանը զրուցում է երեխաների հետ
© Photo : press office of Yerevan municipality
Շատերի պատկերացմամբ` կենդանի պահելը սահմանափակվում է նրան կերակրելով։ Առաքելյանի խոսքով` շատ ավելի կարևոր պայման է կենդանիներին բժշկական ծառայությամբ ապահովելը։ Քանի որ միայն այդպես պաշտպանված կլինի և՛ կենդանին, և՛' նրա տերն ու շրջապատում գտնվող անձինք։
«Ծրագրի գաղափարը շատ վաղուց կար, ուղղակի տարբեր ժամանակներում տարբեր խանգարող հանգամանքներ են եղել։ Բայց փաստացի սա պետության կողմից կազմակերպված առաջին այսօրինակ ծրագիրն է, որն անցկացվում է դպրոցներում»,– Sputnik Արմենիայի հետ զրույցում ասաց Հարություն Առաքելյանը։
Նրա խոսքով` մեր հասարակության մեջ սերմանված է, որ շունը վտանգավոր է, նրանից պետք է վախենալ։ Ուստի երեխաների հետ պարտադիր է քննարկել շների հետ վարվելու կանոնները ու պատասխանել նրանց հուզող բոլոր հարցերին։
Գրքույկում ներկայացված են շների հետ վարվելու կանոնները
© Sputnik / Astghik Sukiasyan
«Այս երեխաները շատ լավ ուսումնասիրում են շներին և նրանց հետ կապված պատմությունները, բայց մեզ պակասում է թափառող կենդանիներ որդեգրելու գաղափարը։ Երեխաներից շատերը շուն են պահում, բայց դրանք հիմնականում որևէ ցեղատեսակի շներ են, և չկար մի երեխա, որը փողոցից էր շուն վերցրել»,–ասաց Առաքելյանը։
Հանդիպման ընթացքում երեխաների հետ պայմանավորվածություն ձեռք բերվեց, որ նրանք իրենց ստացած տեղեկությունները կտարածեն ընկերների, բարեկամների, հարազատների շրջանում։
«Մեր օրերի երեխաները բավականին ինֆորմացված են, ճկուն ուղեղ ունեն և իրենց ունեցած ինֆորմացիան այնքան լավ են մատուցում, որ անկախ տարիքից ու երևույթի մասին պատկերացումից, սկսում ես մտածել երեխայի ասածների մասին։ Այդ պատճառով ծրագրի իրականացման սկզբնական փուլում նախապատվությունը տվել ենք 3-5–րդ դասարանի աշակերտներին»,–ասաց ՀՈԱԿ–ի տնօրենը, որը շատ էր տպավորվել երեխաների հետ հանդիպումից։
Նա ընդգծեց, որ երեխաները շների մասին իրական տեղեկությունների վրա հիմնված, կենդանուն ավելի բարի դարձնելուն ուղղված, մի փոքր էլ ուռճացրած պատմություններ էին պատմում։
«Այսինքն` երեխան շանը դիտարկում է որպես բարի կենդանի։ Դա ամենաուրախացնող փաստն է»,– ասաց նա։
Երևանի Միքայել Նալբանդյանի անվան թիվ 33 դպրոցի աշակերտներ
© Sputnik / Astghik Sukiasyan
Առաքելյանը հույս ունի, որ ծրագիրը դրական արդյունք կունենա, քանի որ ուսումնասիրությունները ցույց են տալիս, որ շների կծման դեպքերի մի մասը նաև երեխաների ոչ ճիշտ վարքի կանոնների հետևանք է։ Ծրագրի կարևոր նպատակն է բացառել սխալ շփումը կենդանիների հետ` նվազագույնի հասցնելով կծման դեպքերի քանակը։
Հանդիպման վերջում երեխաները խոստացան ծնողների հետ այցելել «Կենդանիների խնամքի կենտրոն», ծանոթանալ ՀՈԱԿ–ի գործունեությանը և որդեգրել իրենց դուր եկած շանը։
