Երեխաների մահվան անմիջական պատասխանատուն Բաքուն է. Մարուքյանը պատասխանել է Ալիևի օգնականին
10:10 14.07.2023 (Թարմացված է: 10:14 14.07.2023)
Էդմոն Մարուքյան
© Sputnik / Aram Nersesyan
Բաժանորդագրվել
Էդմոն Մարուքյանը հիշեցրել է, որ Ադրբեջանը պատանդ է պահում 120 հազար էթնիկ հայերի, այդ թվում՝ 30 հազար երեխաների։
ԵՐԵՎԱՆ, 14 հուլիսի – Sputnik. Ադրբեջանի նախագահի օգնական Հիքմեթ Հաջիևն անամոթ ստեր է տարածում։ Այս հայտարարությունն արել է ՀՀ հատուկ հանձնարարություններով դեսպան Էդմոն Մարուքյանը։
Երեկ Հաջիևը պարող մարդկանց տեսագրություն է հրապարակել իր միկրոբլոգում և նշել, թե իբր սուտ են հայկական կողմի պնդումներն այն մասին, թե տարածաշրջանում մարդասիրական ճգնաժամ է։
«Ադրբեջանի ներկայացուցիչն անամոթ ստեր է տարածում՝ տարածելով հին ընտանեկան տեսանյութ ու փորձելով ծածկել իր պետության, իր նախագահի կողմից իրականացվող էթնիկ զտումների քաղաքականությունը»,– գրել է Մարուքյանը։
Նա ընդգծել է, որ Ադրբեջանը պատանդ է պահում 120 հազար էթնիկ հայերի, այդ թվում՝ 30 հազար երեխաների՝ կտրելով նրանց ամբողջ աշխարհից, արգելափակելով գազի և էլեկտրաէներգիայի մատակարարումը և սովամահ անելով նրանց։
«Սա այն է, ինչ Հաջիևը փորձում է թաքցնել իր կեղծ հայտարարության հետևում։ ԼՂ բնակիչ 3 տարեկան Լեոն և 6 տարեկան Գիտան մահացել են ծանր հումանիտար իրավիճակի հետևանքով: Այս հանցագործության անմիջական պատասխանատուն Ադրբեջանի իշխանությունն է»,– եզրափակել է ՀՀ հատուկ հանձնարարություններով դեսպանը։
The representative of Azerbaijan, spreads shameless lies by circulating an old family video and trying to cover the policy of ethnic cleansing implemented by his state and his president. Azerbaijan keeps 120,000 ethnic Armenians, including 30,000 children as hostages, cutting… pic.twitter.com/mw7S3H9fms
— Edmon Marukyan (@edmarukyan) July 13, 2023
Նշենք, որ ըստ ԶԼՄ–ների` երեխաների մայրը` Վերա Նարիմանյանը, փոքրիկներին տանն է թողել, ինքն էլ Մարտակերտ է գնացել որպես օգնություն տրվող ձեթի և շաքարավազի հետևից։ Մոր բացակայության ժամանակ երեխաները տնից դուրս են եկել` թերևս նրան փնտրելու, ժամեր անց փոքրիկների անշնչացած մարմինները մեքենայի մեջ են հայտնաբերել։ Ենթադրվում է, որ երեխաները հոգնել են, պատահական մեքենա գտել, մեջը մտել հանգստանալու համար։ Նախնական տվյալներով` շոգից շնչահեղձ են եղել։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
