Ընտրությունից հետո կարելի է ստուգել. Ավինյանը` ցուցակներում հանգուցյալների անունների մասին
13:42 17.09.2023 (Թարմացված է: 13:45 17.09.2023)
Տիգրան Ավինյան
© Sputnik / Aram Nersesyan
Բաժանորդագրվել
Քաղաքապետի ՔՊ–ական թեկնածուն անտրամաբանական է համարում վարչական ռեսուրսի կիրառման մասին մեղադրանքները։
ԵՐԵՎԱՆ, 17 սեպտեմբերի – Sputnik. Երևանում ընտրողների իրավունք ունեցող անձանց ցուցակներում կարող էին լինել անճշտություններ, բայց ընտրություններից հետո կարելի է ստուգել` ովքեր են գնացել ընտրությունների։ Ընտրատեղամասի մոտ լրագրողների հետ զրույցում հայտարարությունն արեց Երևանի քաղաքապետի թեկնածու Տիգրան Ավինյանը։
Ավելի վաղ հայտնել էինք, որ ՀՀ ՆԳՆ միգրացիայի և քաղաքացիության ծառայությունը ստուգումների արդյունքում ընտրացուցակներում 381 անճշտություն է հայտնաբերել, որոնցից 229 դեպքում մահացած անձանց տվյալներ են եղել։
«Այստեղ մեզ մեղադրելու որևէ տրամաբանություն չկա, կարծում եմ` կկարողանաք ընտրությունների վերջում գնալ ու տեսնել, թե այդ մարդկանց քանի տոկոսն է գնացել ընտրության, դա մեզ հետ որևէ կապ չունի։ Իմ տեղեկատվությամբ` ինչ–որ ավտոմեքենայի առուվաճառքով զբաղվող մեծ խումբ է եղել, և մարդ է եղել, որ գրանցել է իրենց»,– ասաց Ավինյանը` անդրադառնալով միևնույն հասցեում հաշվառված ավելի քան 25 անձանց դեպքին։
Անդրադառնալով լրագրողներից մեկի հարցին, որ ընտրացուցակներում նաև 200-ից ավելի հանգուցյալների անուններ են հայտնվել` քաղաքապետի ՔՊ–ական թեկնածուն կրկին առաջարկեց ընտրություններից հետո ստուգել, թե նրանց անուններից քանիսի դիմաց ստորագրություն կա։
Ավինյանը մեկնաբանեց նաև վարչական ռեսուրսի կիրառման մասին խոսակցությունները` շեշտելով, թե տրամաբանություն չկա դրա մեջ, եթե իրենք գնում են արդար, ժողովրդավար ընտրությունների։
Հիշեցնենք` Երևանում այսօր ավագանու ընտրություններ են անցկացվում, որին մասնակցում են 13 կուսակցություն և 1 դաշինք.
«Հայաստանի եվրոպական» կուսակցություն (թեկնածուն` Տիգրան Խզմալյան),
«Ժողովրդավարական համախմբում» կուսակցություն (Սուրեն Պետրոսյան),
«Քաղաքացիական պայմանագիր» կուսակցություն (Տիգրան Ավինյան),
«Հանուն սոցիալական արդարության» կուսակցություն (Արման Ղուկասյան),
«Ուժը հայրենյաց» կուսակցություն (Նելլի Հարությունյան),
«Հանրային ձայն» կուսակցություն (Արտակ Գալստյան),
«Ազգային առաջընթաց» կուսակցություն (Հայկ Մարության),
«Հաղթանակ» կուսակցություն (Վիկտոր Մնացականյան),
«Ապրելու երկիր» կուսակցություն (Մանե Թանդիլյան),
«Հանրապետություն» կուսակցություն (Արտակ Զեյնալյան),
«Միացյալ Հայաստան» կուսակցություն (Երվանդ Թարվերդյան),
«Արդար Հայաստան» կուսակցություն (Նորիկ Նորիկյան),
«Լուսավոր Հայաստան» կուսակցություն (Դավիթ Խաժակյան),
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։
Նշենք, որ ժամը 08։00–ին Երևանի 12 վարչական շրջաններում բացվել են 475 ընտրական տեղամասերի դռները։
Երևանի քաղաքի գրանցում ունեցող քաղաքացիները կարող են մինչև երեկոյան 20։00–ն մասնակցել ավագանու ընտրություններին և իրենց քվեն տալ նախընտրած ուժին։
Սեպտեմբերի 7-ի դրությամբ Երևանում ընտրողների թիվը կազմում է 824 հազար 250։ Ըստ վարչական շրջանների` ամենաշատ ընտրողները Շենգավիթ համայնքում են` 110780, իսկ ամենաքիչը Նուբարաշենում` 8065։
