Ընտրողից պահանջել են հրապարակել, թե ում օգտին է քվեարկել. ինչ խախտումներ է գրանցել ԿԸՀ–ն
14:35 17.09.2023 (Թարմացված է: 15:18 17.09.2023)
ԿԸՀ
© Sputnik / Aram Nersesyan
Բաժանորդագրվել
ԿԸՀ անդամ Ժիրայր Կարապետյանը ներկայացրել է, թե ինչ զանգեր են ստացվել հանձնաժողովի իրավիճակային կենտրոն։
ԵՐԵՎԱՆ, 17 սեպտեմբերի – Sputnik. Կենտրոնական ընտրական հանձնաժողովն այսօր ահազանգեր է ստացել, որ ընտրողներից պահանջում են հրապարակել, թե ում օգտին են քվեարկել։ Այս մասին մամուլի ասուլիսում ասաց ՀՀ ԿԸՀ անդամ Ժիրայր Կարապետյանը` ներկայացնելով հանձնաժողովի իրավիճակային կենտրոն ստացված զանգերը։
Կարապետյանը հիշեցրեց, որ չի թույլատրվում ընտրողին պարտադրել որևէ եղանակով հրապարակել իր քվեարկությունը։
«Ավելին` քվեարկության արդյունքը հայտնելը հարկադրելը կարող է առաջացնել քրեական պատասխնատվություն, ուստի հորդորում եմ զերծ մնալ նման վարքագիծ դրսևորելուց»,–ասաց նա։
Որոշ ահազանգեր վերաբերել են նոր անձնագրերին, որոնք չեն ճանաչվել, քանի որ էլեկտրոնային ցուցակներում ներդրված է եղել այն անձը հաստատող փաստաթուղթը, որը ներբեռնման պահին գոյություն է ունեցել։ Այս տեխնիկական խնդիրը շտկվել է տեղում։
Մեկ ուրիշ ահազանգ եղել է հայերենի չտիրապետող օտարերկրացի ընտրողի կողմից։ Հրահանգվել է հանձնաժողովներին հերթականությամբ այդ մարդկանց համար ընթերցել կուսակցությունների և թեկնածուների անունները։
Ահազանգեր են եղել տեղամասում գտնվելու իրավունք չունեցող անձանց` տեղամասում գտնվելու վերաբերյալ։ Այս տեղեկությունը ԿԸՀ–ի կողմից ուսումնասիրվել է և պարզվել է, որ միջազգային դիտորդները տեղամասային կենտրոն են ներկայացել ընտրական օրենսգրքով սահմանված թարգմանչի ուղեկցությամբ։ Հետևաբար` թարգմանչի առկայությունը իրավախախտում չէ։
ԿԸՀ անդամը նշեց, որ ընդհանուր առմամբ հիմնականում քաղաքացիների դժգոհությունների մեծ մասը կապված է ընտրողներին ծանուցում չուղարկելու հետ, սակայն բացը լրացվում է ԿԸՀ աշխատակիցների կողմից։
Հիշեցնենք, որ Երևանի ավագանու ընտրություններին այսօր մասնակցում են 13 կուսակցություն և 1 դաշինք
«Հայաստանի եվրոպական» կուսակցություն (թեկնածուն` Տիգրան Խզմալյան)1.
«Ժողովրդավարական համախմբում» կուսակցություն (Սուրեն Պետրոսյան),2.
«Քաղաքացիական պայմանագիր» կուսակցություն (Տիգրան Ավինյան),3.
«Հանուն սոցիալական արդարության» կուսակցություն (Արման Ղուկասյան),4.
«Ուժը հայրենյաց» կուսակցություն (Նելլի Հարությունյան),5.
«Հանրային ձայն» կուսակցություն (Արտակ Գալստյան),6.
«Ազգային առաջընթաց» կուսակցություն (Հայկ Մարության),7.
«Հաղթանակ» կուսակցություն (Վիկտոր Մնացականյան),8.
«Ապրելու երկիր» կուսակցություն (Մանե Թանդիլյան),9.
«Հանրապետություն» կուսակցություն (Արտակ Զեյնալյան),10.
«Միացյալ Հայաստան» կուսակցություն (Երվանդ Թարվերդյան),11.
«Արդար Հայաստան» կուսակցություն (Նորիկ Նորիկյան),12.
«Լուսավոր Հայաստան» կուսակցություն (Դավիթ Խաժակյան),13.
«Մայր Հայաստան» դաշինք («Երկիր Ծիրանի» և «Ինտելեկտուալ Հայաստան կուսակցություններ) (Անդրանիկ Թևանյան)։
