ԵՐԵՎԱՆ, 24 փետրվարի — Sputnik. Վարժանքների վայրին մոտ բնակվող աղջնակը վազելով մոտեցավ Sputnik Արմենիայի թղթակցին ու զարմացած հայացքով նայեց նրան:
«Չգիտեմ՝ այստեղ ինչ է կատարվում, բայց ես ուզում եմ տուն գնալ: Կարո՞ղ եմ անցնել», — հարցրեց աղջիկն ու հարցական հայացքով նայեց «Կարմիր խաչի» փրկարարներին ու հրշեջներին, ովքեր արդեն օգնություն էին ցուցաբերում հրդեհից «տուժածին»:
Տարհանման ժամանակ վնասվածք ստացած կնոջ ձեռքին վիրակապ դրեցին: Ձեռքի մեջ ապակու կտոր էր մնացել:
Մարտավարական վարժանքների ժամանակ այնպիսի դժբախտ պատահարներ են «բեմադրում», որոնք կարող են նաև իրական կյանքում լինել:
Աղջիկը հենց այդպիսի «դժբախտ պատահարի» ականատեսը դարձավ ու սկզբում չէր էլ հասկանում՝ ինչ է իրականում կատարվել ու ինչու են ծառայության աշխատակիցները դիմակներով կանգնել իրենց տան դիմաց:
«Սա է իմ տունը: Ես գնամ էլի», — թախանձեց նա ու մարդկանց միջով վազեց դեպի տուն:
Այս անգամ հրդեհը «բռնկվել» էր ծառայության շենքում, տնօրենի սենյակի մոտ: Ղեկավարի օգնականը այրվող հաղորդալարերի հոտ էր զգացել ու սկսել էր անմիջապես տարհանել աշխատակիցներին, հետո նաև՝ մշակութային արժեքները:
Քաղպաշտպանության ղեկավարը միանգամից 911 էր զանգահարել ու կանչել հրշեջներին:
Նրանք ժամանեցին 5 րոպե անց, կազմ-պատրաստ, աստիճան դրեցին, հանեցին հրշեջ խողովակն ու սկսեցին մարել կրակը:
Երևանի ՓՎ Կենտրոն բաժնի պետ, փրկարար ծառայության փոխգնդապետ Կամո Ոսկանյանը նշեց, որ նման միջոցառումների նպատակն է ստուգել աշխատանքի որակը, արտակարգ իրավիճակների ժամանակ փրկարարների ու տարբեր կառույցների աշխատակիցների աջակցման մակարդակը:
«Վարժանքների արդյունքները բարձր եմ գնահատում: Դրանք ցույց տվեցին, որ փրկարարներն ու ծառայության աշխատակիցները կարողանում են փրկարարական համատեղ աշխատանքներ իրականացնել: Ես կարծում եմ, որ ծառայության աշխատակիցները նույնպես լավ աշխատեցին», — ասաց Ոսկանյանը:
Վարժանքների ընթացքում փրկարարները սենյակից դուրս բերեցին ծխի պատճառով գիտակցությունը կորցրած աշխատակցին: Այնուհետև փրկարարները կարողացան դուրս բերել նաև մշակութային արժեքները:
ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի ղեկավար Վլադիմիր Պողոսյանը նույնպես բարձր գնահատեց պրոֆեսիոնալների գործողությունները:
«Նման միջոցառումները հնարավորություն են տալիս անհրաժեշտության դեպքում լիովին պատրաստ լինել, ինչպես նաև համապատասխան միջոցներ ձեռնարկել, ստուգել աշխատակիցների պատրաստվածությունն ու հմտությունները, որպեսզի հետագայում լրացնեն բացը», — ասաց Պողոսյանը:
Մասնագետներն ավելացրին, որ նման դեպքերում անհապաղ պետք է զանգահարել 911 ծառայություն ու ձեռքերը ծալած չնստել, եթե որևէ մեկն օգնության կարիք ունի: