ԵՐԵՎԱՆ, 30 հուլիսի — Sputnik. Փաստաբանները դատապարտյալների հիվանդանոցում «Սասնա ծռեր» խմբի անդամ Արամ Մանուկյանի պահման պայմանների մասին ընդդեմ Հայաստանի Հանրապետության դիմում են ներկայացրել Մարդու իրավունքների եվրոպական դատարան (ՄԻԵԴ):
Ինչպես Sputnik Արմենիայի հետ զրույցում հայտնեց ՀՀ փաստաբանների պալատի խորհրդի անդամ Կարեն Մեժլումյանը, Արամ Մանուկյանի պաշտպան Ինեսա Պետրոսյանի դիմումը վերաբերում է Մարդու իրավունքների եվրոպական կոնվենցիայի (ՄԻԵԿ) 3-րդ հոդվածի խախտմանը: Այն սահմանվում է, որ «ոչ ոք չպետք է ենթարկվի խոշտանգումների կամ անմարդկային ու նվաստացնող վերաբերմունքի կամ պատժի»:
Հիշեցնենք՝ Արամ Մանուկյանի պաշտպան Ինեսա Պետրոսյանը պահանջում էր իր պաշտպանյալին «Դատապարտյալների հիվանդանոց» ՔԿՀ-ից տեղափոխել քաղաքային հիվանդանոց՝ հայտարարելով, որ իր նա պահվում է անմարդկային և նվաստացուցիչ պայմաններում և կարող է արյան վարակ ստանալ:
ՔԿՀ ղեկավարությունն էլ վստահեցնում էր, որ հիվանդանոցի տարածքը պարբերաբար ախտահանվում է, Արամ Մանուկյանն էլ ապահովված է անհրաժեշտ բժշկական օգնության միջոցներով, և հիվանդասենյակի սանիտարահիգիենիկ պայմանները բավարար են:
Ավելի ուշ Արամ Մանուկյանին այցելած ՄԻՊ գրասենյակի աշխատակիցները հայտարարեցին, որ Արամ Մանուկյանը տեղափոխվել է կարանտինային բաժանմունք, որտեղ պայմանները զգալիորեն տարբերվում են հիվանդախցերի պայմաններից: