ԵՐԵՎԱՆ, 23 նոյեմբերի — Sputnik. ՀՀ կառավարությունն այսօր որոշեց դիմել ԱԺ նախագահին` 2017 թվականի դեկտեմբերի 12-ին, ժամը 10:00-ին խորհրդարանի արտահերթ նիստ գումարելու առաջարկով։
Նիստի օրակարգում ներառված է 19 հարց, որոնք ՀՀ կառավարությունն այսօր անհետաձգելի որակեց։ Դրանց թվում են նաև հանրության շրջանում աղմուկ առաջացրած «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագիծն ու ՌԴ-ից սպառազինություն ձեռք բերելու նպատակով 100 մլն դոլարի վարկային համաձայնագրի վավերացման հարցը։
Անհետաձգելի հարցերի թվում են նաև «Հայաստանի Հանրապետության և ՆԱՏՕ-ի ապահովման եւ մատակարարման կազմակերպության միջև՝ համագործակցության աջակցության», «ԵԱՏՄ մաքսային օրենսգրքի» մասին պայմանագրերը վավերացնելու, ինչպես նաև «Պետական պաշտոններ զբաղեցնող անձանց վարձատրության մասին» օրենքում փոփոխություններ կատարելու մասին օրինագիծը։