ԵՐԵՎԱՆ, 22 մայիսի — Sputnik. ՀՀ ԱԺ նախագահ Արա Բաբլոյանը սրտանց շնորհավորել է Շառլ Ազնավուրին ծննդյան 94-րդ տարեդարձի առթիվ և ջերմությամբ հիշել նրա հետ հանդիպումները Հայաստանում, Ֆրանսիայում և Շվեյցարիայում:
«Կատարողական բացառիկ արվեստի և հեղինակած շուրջ ութ հարյուր երգերի շնորհիվ Դուք վաղուց Ձեր ուրույն տեղն եք զբաղեցրել համաշխարհային երգարվեստում: Միաժամանակ ստեղծել եք էստրադային երգի ինքնատիպ և ունկնդրին այնքան հոգեհարազատ դպրոց` իրավամբ վաստակելով «մեծ շանսոնիե» կոչումը»,- նշված է ԱԺ նախագահի ուղերձում:
Բաբլոյանի խոսքով` Հայաստանում սիրում են Ազնավուրի երգերը, ուրախությամբ հետևում են նրա ստեղծագործական ու բեմական հաջողություններին և հպարտանում երգչով:
«Անգնահատելի է այն հսկայական աշխատանքը, որը կատարեցիք Սպիտակի աղետալի երկրաշարժից հետո «Ազնավուրը Հայաստանին» հիմնադրամի միջոցով: Իսկ «Քեզ համար, Հայաստան» երգը դարձավ գթասրտության նորօրյա ու յուրօրինակ հիմն ողջ աշխարհում»,- ասել է Բաբլոյանը:
ԱԺ նախագահը մաեստրոյին մաղթել է առողջություն, երջանկություն, ստեղծագործական անսպառ եռանդ և ամենայն բարիք։
Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը (իսկական անունը` Շահնուր Վաղինակ Ազնավուրյան) ծնվել է 1924թ.-ի մայիսի 22-ին Փարիզում՝ հայ գաղթականներ Միքայել և Քնար Ազնավուրյանների ընտանիքում: Մանուկ հասակում տարվել է թատրոնով, իսկ 1940-ական թթ. Պիեռ Ռոշի հետ հանդես է եկել կաբարեում։
Համաշխարհային հռչակ է ձեռք բերել 1956թ.-ին Փարիզի դահլիճներից մեկում հաջող ելույթից հետո։ Նրա գրած երգերը կատարել են Էդիտ Պիաֆը, Լայզա Մինելին, Մստիսլավ Ռոստրոպովիչը, Հուլիո Իգլեսիասը, Շերը, Ջո Դասենը, Ռեյ Չարլզը և այլք։
Շառլ Ազնավուրը միջազգային ասպարեզում ռեկորդային թվով ձայնասկավառակ է վաճառել (180 մլն)։