ԵՐԵՎԱՆ, 14 օգոստոսի — Sputnik. Կասպից ծովի իրավական կարգավիճակի մասին հռչակագիրն այն երկրների գործն է, որոնք ստորագրել են փաստաթուղթը։ Այս մասին այսօր ճեպազրույցի ժամանակ ասաց Հայաստանի ԱԳՆ մամուլի քարտուղարի ժամանակավոր պաշտոնակատար Աննա Նաղդալյանը։
Հիշեցնենք` օգոստոսի 12-ին Կասպից հնգյակի պետությունների առաջնորդները ղազախական Ակտաուում Կասպից ծովի իրավական կարգավիճակի մասին հռչակագիր են կնքել։ Փաստաթղթի կնքման արարողությունը կայացել է հինգերորդ Կասպից գագաթնաժողովի ավարտից հետո։ Փաստաթղթի համաձայն՝ Կասպից ծովի ջրային մակերեսի ընդհանուր տարածքը մնալու է կողմերի ընդհանուր օգտագործման համար, իսկ հատակը և ընդերքը բաժանվում են հարևան պետությունների միջև միջազգային իրավունքի հիման վրա նրանց միջև ձեռք բերված պայմանավորվածությունների համաձայն:
«Դա վերաբերում է ծովափնյա հինգ պետություններին։ Այստեղ մենք մեկնաբանելու շատ բան չունենք: Բայց մենք հետևում ենք բոլոր այն գործընթացներին, որոնք կարող են ուղղակիորեն կամ անուղղակիորեն ազդեցություն ունենալ Հայաստանի վրա։Հայաստանը հետևում է զարգացումներին և դրանցից կախված կանի համապատասխան հետևություններ»,- ասաց նա:
Ավելի վաղ ՀՀԿ խմբակցության պատգամավոր Արմեն Աշոտյանը հայտնել էր, որ Կասպից ծովի իրավական կարգավիճակի մասին հռչակագիրը կարող է տարածաշրջանում երկարատև ու գլոբալ փոփոխությունների հիմք դառնալ։