ԵՐԵՎԱՆ, 20 մայիսի – Sputnik. ՀՀ պաշտպանության նախարարության ռազմական ոստիկանները կաշառք ստանալու և պաշտոնեական դիրքի չարաշահման դեպքեր են բացահայտել։ Տեղեկությունը հայտնում է ՊՆ մամուլի ծառայությունը։
«ՀՀ ՊՆ ՌՈ կենտրոնական ապարատի ՔՀԲ-ում ստացված օպերատիվ տեղեկությունները Գյումրու ՌՈ բաժանմունքի աշխատակիցների հետ համատեղ իրացնելիս` ս.թ. մայիսի 19-ին Գյումրու ՌՈ բաժանմունք է հրավիրվել N զորամասի ֆինանսական ծառայության պետը, որը հաղորդում և բացատրություն է տվել, որ 2019 թ. մարտ ամսին իր կնոջը N զորամաս աշխատանքի ընդունելու դիմաց, նույն զորամասի ֆինանսական ծառայության պետին առձեռն տվել է 1000 ԱՄՆ դոլար գումար, որն էլ նշված գումարը փոխանցել է զորամասի հրամանատարին»,- նշված հաղորդագրության մեջ:
Գյումրու ՌՈ բաժանմունք է հրավիրվել տվյալ զորամասի ֆինանսական ծառայության նախկին պետը, որը համապատասխան հաղորդում ու բացատրություն է տվել, որ աշխատանքի ընդունելու համար միջնորդել է զորամասի հրամանատարին, որի համար վերջինս պահանջել և ստացել է 1000 ԱՄՆ դոլար գումար: Փաստի առթիվ Գյումրու ՌՈ բաժանմունքում նախապատրաստվում են նյութեր:
Բացահայտվել են նաև պաշտոնեական դիրքի չարաշահման դեպքեր:
N զորամասի ֆինանսական ծառայության նախկին պետը հաղորդում է տվել, որ 2017թ-ի փետրվար ամսին նույն զորամասի հրամանատարն իր աշխատասենյակում առաջարկել է գնորդ գտնել զորամասին հասանելիք էլեկտրաէներգիայի չափաքանակի ամսական առաջացած ավելցուկը վաճառելու համար: Զորամասի ֆինանսական ծառայության պետը դիմել է իր ծանոթին՝ զորամասի տարածքը սպասարկող էլցանցի տեղամասի պետին, որը համաձայնել է յուրաքանչյուր կիլովատի դիմաց վճարել 9 դրամ:
Մինչև 2019թ-ի ապրիլ ամիսը զորամասի ֆինանսական ծառայության պետը յուրաքանչյուր ամիս առձեռն ստացել է 150.000-ից 400.000 ՀՀ դրամ գումար, ընդհանուր առմամբ՝ 2.500.000-ից 3.000.000 դրամ, որն էլ զորամասի ֆինանսական ծառայության պետը զորամասի հրամանատարին է փոխանցել վերջինիս աշխատասենյակում:
ՊԵԿ–ի տեսուչներն «աչք փակելու համար» 30.000 դոլար կաշառք են պահանջել. ԱԱԾ–ի տեսանյութը
Զորամասի հրամանատարը յուրաքանչյուր ամիս ֆինանսական ծառայության պետին տվել է 20.000-ից 30.000 դրամ, ընդհանուր առմամբ՝ 300.000-ից 400.000 ՀՀ դրամ և նույնքան էլ զորամասի ԿՇԾ (կոմունալ շահագործման ծառայության) պետին, որը կատարել է էլեկտրաէներգիայի հաշվիչի ցուցմունքների ուղղումները:
N զորամասի նախկին ֆինանսական ծառայության պետը հաղորդում է տվել նաև առ այն, որ 2018թ. հոկտեմբերին նույն զորամասի հրամանատարն իր աշխատասենյակում առաջարկել է, որ գնորդ գտնի զորամասին հասանելիք գազի չափաքանակի ամսական առաջացած ավելցուկը վաճառելու համար: Ֆինանսական ծառայության պետը դիմել է գազի գրասենյակի աշխատակից իր ծանոթին, որը համաձայնվել է յուրաքանչյուր խորանարդ մետր գազի դիմաց վճարել 23 ՀՀ դրամ գումար: 2019թ-ի հունվար ամսին, զորամասի 2018թ-ի գազի ծախսից առաջացած ավելցուկը հաշվարկելուց հետո, գրասենյակի աշխատակիցը զորամասի ֆինանսական ծառայության պետին առձեռն փոխանցել է 2.000.000 ՀՀ դրամ գումար, որն էլ վերջինս փոխանցել է զորամասի հրամանատարին: Հաշվիչի ցուցմունքների ուղղումը կատարել է զորամասի ԿՇԾ պետը:
Տրված հաղորդումներն ուղարկվել են Շիրակի կայազորի զինվորական դատախազություն՝ հետագա ընթացքը լուծելու համար:
«Մուլտի գրուպի» տնօրենը խոշոր կաշառք է տվել Գագիկ Խաչատրյանին. նոր մանրամասներ