«Մարտի են գնում» հայ երգիչները. լավագույնները «Ծիծեռնակի» կարժանան

ԵՐԵՎԱՆ, 30 հունվարի — Sputnik. Հայկական երաժշտարվեստի տարբեր ժանրերում ստեղծագործող անհատների, ստեղծագործական խմբերի գործունեությունն արժևորելու և խրախուսելու, ինչպես նաև 2016 թվականի ընթացքում երաժշտության բնագավառում նշանակալի նվաճումները հանրության լայն շերտերին ներկայացնելու նպատակով` ՀՀ մշակույթի նախարարության նախաձեռնությամբ 2017 թ. մարտի 25-ին, Ա. Սպենդիարյանի անվան օպերայի և բալետի ազգային ակադեմիական թատրոնում կկայանա «Ծիծեռնակ» ազգային երաժշտական մրցանակաբաշխությունը:

ՀՀ մշակույթի նախարարության մամուլի ծառայությունը հայտնում է, որ մրցանակաբաշխության արդյունքները կամփոփեն մրցութային հեղինակավոր հանձնաժողովները, որոնք նախագահում են` ՀՀ ժողովրդական արտիստ, կոմպոզիտոր Տիգրան Մանսուրյանը (դասական ժանրում), ՀՀ ժողովրդական արտիստ, երգիչ Ռուբեն Մաթևոսյանը (ժողովրդական ժանրում) և ՀՀ ժողովրդական արտիստ, կոմպոզիտոր Ռոբերտ Ամիրխանյանը (մասսայական (POP) ժանրում): Մրցանակաբաշխության հաղթողները կարժանանան «Ծիծեռնակ» մրցանակին, որը հեղինակել է Արման Դավթյանը (Նուռ):

Մրցանակաբաշխությունը կիրականացվի հետևյալ անվանակարգերում.

• Դասական ժանրում լավագույն երաժշտախումբ

• Դասական ժանրում լավագույն երաժիշտ-կատարող

• Դասական ժանրում լավագույն ալբոմ

• Ժողովրդական ժանրում լավագույն երաժշտախումբ

• Ժողովրդական ժանրում լավագույն երաժիշտ-կատարող

• Ժողովրդական ժանրում լավագույն ալբոմ

Մասսայական (POP) ժանրում.

• Լավագույն երգիչ (ուհի)

• Լավագույն ռոք խումբ

• Լավագույն ջազ խումբ կամ կատարող

• Լավագույն ալբոմ

• Տարվա հիթ

• Լավագույն համերգային ծրագիր (բոլոր ժանրերում)

• Լավագույն տեսահոլովակ (բոլոր ժանրերում)

Մրցանակաբաշխությանը կարող են մասնակցել 2016 թ. ընթացքում երաժշտական տարբեր ժանրերում իրականացված ծրագրեր, ստեղծագործող անհատ կատարողներ և խմբեր, ձայնագրման ստուդիաներ, հեռուստաընկերություններ և ռադիոընկերություններ:

Մրցանակաբաշխությանը մասնակցելու հայտ կարող են ներկայացնել ինչպես իրավաբանական (պետական և մասնավոր կազմակերպություններ), այնպես էլ ֆիզիկական անձիք (ստեղծագործողներ, կատարողներ, պրոդյուսերներ և այլք):

Մրցույթի արդյունքները կամփոփվեն ներկայացված հայտերի հիման վրա: Մրցույթին կմասնակցի այն անվանակարգը, որին ներկայացված է առնվազն երկու հայտ:

Մրցանակաբաշխության մասնակցության հայտերն ընդունվում են 2017 թ. փետրվարի 1-ից 28-ը, ժամը 10:00-ից մինչև 17:00` բացի շաբաթ և կիրակի օրերից, Երևանի թատրոնի և կինոյի պետական ինստիտուտում: