ԵՐԵՎԱՆ, 18 նոյեմբերի — Sputnik. Ռուսական «Ձայնը» երգի մրցույթի վեցերորդ եթերաշրջանի մասնակից Դիանա Շալժիյանը լքեց նախագիծը «Նոկաուտներ» փուլում:
Հայուհին կատարեց «Машина времени» հայտնի խմբի «Он был старше ее» երգը:
Երգն ու գործիքավորումը Դիանային առաջարկել էր նրա մարզիչ, հայտնի երաժիշտ Լեոնիդ Ագուտինը: Աղջիկը ելույթից հետո տված հարցազրույցում պատմել է, որ երգը խորիմաստ է և նա ուզում էր այլ կերպ այն ներկայացնել:
«Ինձ դուր եկավ, ինչպես հնչեց երգը, սակայն կային թերություններ, նյարդերը տեղի տվեցին, մի փոքր վերևի նոտաները հիստերիկ հնչեցին: Իհարկե, կատարողը միշտ ցանկանում է անել ավելին, սակայն ամեն ինչ չէ, որ ստացվեց: Ես կաշխատեմ այդ ուղղությամբ»,- ասել է նա:
Ժյուրիի անդամները նշեցին գործիքավորման յուրահատկությունը, սակայն չհամաձայնեցին տոնայնության և երգի մատուցման հետ:
«Չստացվեց այնպես, ինչպես կարող էր լինել: Դուք ավելի հզոր կարող եք կատարել, այդ պատճառով Ձեզնից ավելին է պահանջվում, մի նեղացեք մեզանից: Դա ասում ենք, քանի որ Դուք հզոր երգչուհի եք»,- ասաց երգչուհի Պելագեյան` գնահատելով Դիանայի համարը:
Հայուհու մրցակիցներն էին Միխայիլ Գրիշունոն և Դավիթ Տոդուան, որոնց Ագուտինը թողեց թիմում, իսկ Դիանա Շալժիյանը լքեց նախագիծը: