ԵՐԵՎԱՆ, 22 ապրիլի — Sputnik. Իշխանությունները Հայաստանում ստեղծված ճգնաժամային իրավիճակից միակ ելքը տեսնում են խորհրդարանում քաղաքական երկխոսությունը ընդդիմության և իշխանության միջև։
Այդ մասին Sputnik Արմենիային տված հարցազրույցում հայտարարեց Հայաստանի խորհրդարանի փոխխոսնակ Էդուարդ Շարմազանովը` պատասխանելով այն հարցին, թե հնարավո՞ր է արդյոք բանակցությունների երկրորդ փորձ վարչապետ Սարգսյանի և «Իմ քայլը» ակցիայի առաջնորդ, պատգամավոր Նիկոլ Փաշինյանի միջև։
Հիշեցնենք, որ այսօր Երևանի Արցախի փողոցում ոստիկանները ցրել բողոքի ակցիան։ Դա տեղի է ունեցել Հայաստանի վարչապետ Սերժ Սարգսյանի և ընդդիմության առաջնորդ Նիկոլ Փաշինյանի չհաջողված բանակցություններից կես ժամ անց։ Բախման ընթացքում ձերբակալվել է նաև շարժման առաջնորդը։
Ապրիլի 22–ին Armenia Marriott հյուրանոցում վարչապետի հետ հանդիպմանը Փաշինյանը հայտարարեց, որ այստեղ գտնվում է միայն Սերժ Սարգսյանի հրաժարականը քննարկելու նպատակով, այլ ոչ թե ինչ-որ բանակցություններ վարելու համար։ Սարգսյանը նշեց, որ Փաշինյանը չի բանակցում, այլ վերջնագրի լեզվով է խոսում, որից հետո լքեց հանդիպման վայրը։
«Նորագույն Հայաստանի պատմության մեջ առաջին անգամ վարչապետը ցուցարարների առաջնորդի հետ նստեց բանակցությունների սեղանի շուրջ ուղիղ եթերում», – ասաց Շարմազանովը։
Փոխխոսնակը հիշեցրեց, որ շաբաթ օրը երկխոսության առաջարկով Հանրապետության հրապարակում է եղել նաև նախագահ Արմեն Սարգսյանը, իսկ ինքը` Շարմազանովը, դեռ ապրիլի 18–ին խորհրդարանի ամբիոնից քաղաքական երկխոսության և հանդուրժողականության կոչ է արել։
Նույն կոչերով դիմել են նաև տարբեր իշխանական կառույցներ, քաղաքական կուսակցություններ, հասարակական կազմակերպություններ և գործիչներ։ Ցավոք, Փաշինյանը եկել էր ոչ թե բանակցությունների, այլ վերջնագիր ներկայացնելու համար։
Շարմազանովի կարծիքով` հասարակությունում չպետք է լինեն թշնամիներ և հակառակորդներ, մենք բոլորս նույն հասարակության մի մասն ենք։
«Եթե ինչ-որ մեկին պետք են հզոր ցնցումներ, ապա մեզ պետք է հզոր Հայաստան», – նշեց Շարմազանովը։ Նրա խոսքով` իշխող կուսակցությունը պատրաստ է լսել ցանկացած կառուցողական առաջարկ, այլ ոչ վերջնագիր։
Բանակցությունների երկրորդ փորձի հնարավորության մասին հարցին Շարմազանովը պատասխանեց, որ իշխանությունները միակ ելքը տեսնում են խորհրդարանում ընդդիմության և մեծամասնության միջև քաղաքական երկխոսության միջոցով։
«Փաշինյանն արդեն մեկ անգամ դրսևորել է իր նիհիլիզմը, բայց բանակցությունների վերջնագրով ներկայանալը մաքսիմալիզմ է, սա քաղաքական օրակարգ չէ։ Հայաստանում օրենքով ընտրված իշխանություն կա, որին 2017թ–ին Հայաստանի քաղաքացիներն են ընտրել», – ասաց նա։
Բոլոր միջազգային կազմակերպությունները հայտարարել են, որ ընտրությունները եղել են ազատ և ժողովրդավարական։ Բոլոր ընդդիմադիր խմբակցությունները, այդ թվում` այն, որը գլխավորում է Փաշինյանը, ընդունել են այդ ընտրությունների արդյունքները։
«Ըստ նրանց տրամաբանության, Հայաստանում ընտրությունները պետք է անցկացվեն ամեն ամիս, բայց ինչի՞ համար են նման ընտրությունները», – հարց է տալիս Շարմազանովը։ Փոխխոսնակն ասաց, որ չի կարող լինել այնպիսի իրավիճակ, երբ որոշում է նա, ով ավելի շատ կողմնակիցներ ունի հրապարակում։
Շարմազանովի խոսքով` իշխանությունը պատրաստ է քննարկել ստեղծված իրավիճակը միջազգային կառույցներում, իշխանությունը գործում է բացառապես ի շահ պետության։ Բոլոր ժողովրդավարական երկրներում իրավապահ մարմինները նման դեպքերում կիրառում են ավելի կոշտ միջոցներ, քան հայկական ոստիկանությունը, հավելեց նա։