ԵՐԵՎԱՆ, 14 հոկտեմբերի — Sputnik. Հոկտեմբերի 13-ին՝ ժամը 16.44-ին, ոստիկանություն զանգահարած Ավանի Աճառյան փողոցի դեղատներից մեկի դեղագործը հայտնել էր, որ նույն օրը, ժամը 16.20-ին, անհայտ անձը, ատրճանակի սպառնալիքով, դեղատնից հափշտակել է գումար:
Այս մասին հայտնում են Ոստիկանության հասարակայնության հետ կապերի և լրատվության վարչությունից:
Ոստիկանության Երևան քաղաքի վարչության և Նոր Նորքի բաժնի ծառայողների ձեռնարկած օպերատիվ հետախուզական միջոցառումների շնորհիվ հաշված ժամերի ընթացքում ճշտվել է հանցագործությունը կատարած անձի ինքնությունը:
Ենթադրվում է, որ ավազակային հարձակումը կատարել է 1997 թվականին ծնված Գարիկ Մարտիրոսյան, որն էլ կասկածանքով բերման է ենթարկվել ոստիկանություն։
Ավելի ուշ դեպքի մասին հաղորդագրություն տարածեց նաև Քննչական կոմիտեն:
Նախաքննությունը շարունակվում է: