«Իմ հանձնարարականին չի հետևել». Արայիկ Հարությունյանը պաշտոնյայի է ազատել աշխատանքից

ԵՐԵՎԱՆ, 25 օգոստոսի – Sputnik. Արցախի նախագահ Արայիկ Հարությունյանն աշխատանքից ազատել է Քաշաթաղի շրջանի վարչակազմի ղեկավար Արտյոմ Սարիբեկյանին:

«Այսօր Արտյոմ Սարիբեկյանին աշխատանքից ազատելու մասին կառավարության որոշում եմ հաստատել, իսկ պատճառն իմ հանձնարարականին չհետևելն է՝ պաշտոնական դիրքի չարաշահմամբ որդուն իր ենթակայությամբ վարչակազմի աշխատակազմում գործի ընդունելը», –Facebook–ի իր էջում գրել է նա։

Հարությունյանը դիմել է պետական բարձրաստիճան պաշտոնյաներին` նշելով, որ բոլոր հանձնարարականների կատարման հարցում լինելու է հետևողական, իսկ պաշտոնյաների խնդիրը հայրենիքին բարեխղճորեն ծառայելն է միայն:

Ըստ Արցախի նախագահի` այլապես միասին աշխատելու եզրեր չեն լինի:

Նշենք, որ Արտյոմ Սարիբեկյանը պաշտոնը ստանձնել էր այս տարվա մայիսի 29-ին։

Մարտունիում 500 նոր բնակարան կկառուցվի. Արայիկ Հարությունյան