ԵՐԵՎԱՆ, 30 նոյեմբերի – Sputnik. Արցախում մարդասիրական առաքելության շրջանակներում Ռուսաստանի Դաշնությունից բերված շինանյութերի օգտագործմամբ Ռուսաստանի ԱԻՆ մասնագետները վերականգնողական աշխատանքներ են իրականացրել Ստեփանակերտի մոր և մանկան առողջության պահպանման կենտրոնում։ Ինչպես տեղեկացնում են ՌԴ ԱԻՆ մամուլի ծառայությունից, այսօր արդեն 8 ծննդկանի հնարավոր է եղել ընդունել։ Բժշկական հաստատությունն ամբողջությամբ պատրաստ կլինի առաջիկա օրերին։
Փրկարարները վերականգնողական են աշխատանքներ են իրականացրել Ստեփանակերտի Սախարովի անվան թիվ 8 հանրակրթական դպրոցում: Առաջիկայում դպրոցը կընդունի առաջին աշակերտներին։
Ռուսաստանի ԱԻՆ խմբերը Ստեփանակերտի քաղաքապետարանի ներկայացուցիչների հետ միասին շարունակում են շինանյութեր տրամադրել ռազմական գործողություններից տուժած բնակչությանը: Փրկարարները փորձում են բնակելի տների վերականգնման աշխատանքները ավարտել մինչև ձմռան սկիզբը:
Նշենք, որ Ադրբեջանը հոկտեմբերի 28–ին «Սմերչ» տիպի համազարկային կրակի ռեակտիվ կայանքից հրթիռակոծել էր Ստեփանակերտի ծննդատունը։