ԵՐԵՎԱՆ, 23 օգոստոսի–Sputnik. Ինտերպոլը դադարեցրեց ռուս գործարար Ստերլիգովին որոնելու աշխատանքները, այժմ նա կարող է հանգիստ տեղաշարժվել աշխարհում, հայտնել է նրա փաստաբան Արթուր Հայրապետովը:
Ավելի վաղ Ադրբեջանը գործարար Ստերլիգովին Լեռնային Ղարաբաղ կատարած այցի համար միջազգային որոնում էր հայտարարել` որպես խափանման միջոց ընտրելով կալանավորումը:
Փաստաբանը պարզաբանել է, որ Ստերլիգովը որոնվեց ընդամենը 15 օր, որից հետո Ինտերպոլը չեղյալ հայտարարեց որոշումը:
«Ինտերպոլը բավարարեց պաշտպանական կողմի բողոքը և Ադրբեջանի կողմից իմ պաշտպանյալի նկատմամբ բողոքը ճանաչեց քաղաքական, ինչը հստակորեն արգելված է այդ կազմակերպության կանոնադրությամբ, — պարզաբանել է Հայրապետովը: — Գերման Լվովիչն այժմ կարող է ազատ տեղաշարժվել և հատել ցանկացած սահման»:
Ռուս գործարար, հայտնի ֆերմեր և «Ալիսա» ապրանքային բորսայի հիմնադիր Գերման Ստերլիգովը լքել էր Ռուսաստանը և տեղափոխվել ընտանիքով Լեռնային Ղարաբաղ, իսկ հուլիսի 22-ին Ադրբեջանի գլխավոր դատախազությունը քրեական գործ էր հարուցել Ստերլիգովի նկատմամբ, նրան մեղադրանք էր ներկայացվել պետական սահմանի և անձնագրերի մասին օրենքը, ինչպես նաև Ադրբեջանի միգրացիոն օրենսգրքի պահանջները խախտելու համար: