ԵՐԵՎԱՆ, 10 փետրվարի — Sputnik. ՀՀԿ-ի ղեկավարությունը թույլ չի տա կուսակցության որոշ ներկայացուցիչների խորհրդարանական ընտրություններին ձայներ գնել, ԱԺ-ում տեղի ունեցած ճեպազրույցի ժամանակ ասաց խմբակցության ղեկավար Վահրամ Բաղդասարյանը։
«Մեր կուսակցության անդամներից ոչ մեկին թույլ չենք տա կաշառել ընտրողներին։ Առավել ևս, թույլ չենք տա պարտադրված ընտրություններին մասնակցել։ ՀՀԿ-ն թույլ չի տա իր անդամներին վարկաբեկել կուսակցության անունը և ձայներ գնել», — ասաց Բաղդասարյանը։
Նրա խոսքով` ՀՀԿ-ն չունի այնպիսի օգնականների կարիք, ովքեր արջի ծառայություն են մատուցում, քանի որ իրենք ընտրություններին գնում են երկրի առջև ամբողջ պատասխանատվությամբ։ Պատգամավորը վստահություն է հայտնել, որ ընտրողները կկարողանան տարբերակել պատասխանատու ուժերին նրանցից, ովքեր բարձր պաշտոններ են փնտրում և ցանկանում իշխանություն ձեռք բերել։ Խորհրդարանական ընտրությունները նշանակված են ապրիլի 2-ին։