ԵՐԵՎԱՆ, 18 դեկտեմբերի — Sputnik. Գերմանական «Կանաչներ» կուսակցության համանախագահ Ջեմ Օզդեմիրը դժվար թե գլխավորի Գերմանիայի ԱԳՆ-ն։ Այդ մասին Երևանում լրագրողներին ասաց Բունդեսթագի պատգամավոր Ալբերտ Վայլերը։
Ջեմ Օզդեմիրը Հայոց ցեղասպանության ճանաչման մասին բանաձևի համահեղինակն է, որը 2016թ-ի հունիսին ընդունել է Բունդեսթագը։ Օզդեմիրից բացի բանաձևին կողմ էին քվեարկել 10 թուրք պատգամավոր։ Նրանք բոլորը հսկողության տակ են, իսկ Գերմանիայի ԱԳՆ-ն խորհուրդ է տվել նրանց զերծ մնալ Թուրքիա մեկնելուց։
Հոկտեմբերին գերմանական ԶԼՄ-ները գրել էին, որ Օզդեմիրը կարող է զբաղեցնել արտգործնախարարի պաշտոնը։ Այդ լուրերը հայտնվեցին սեպտեմբերի վերջին Բունդեսթագում կայացած ընտրություններից հետո` իշխող քրիստոնյա դեմոկրատների (Քրիստոնեա-դեմոկրատական միություն/Քրիստոնեա-սոցիալական միություն) և «Կանաչների» կուսակցության միջև կոալիցիայի մասին բանակցությունների ֆոնին, որի համանախագահն Օզդեմիրն է։
Նոյեմբերի վերջին «Կանաչների» և Ազատ դեմոկրատական կուսակցության բանակցությունները դադարեցվեցին։
«Հիմա նրանք բանակցություն են վարում սոցիալ-դեմոկրատների հետ։ «Կանաչների» հետ բանակցությունները հանված են օրակարգից։ Ուստի անհնար է, որ նրանց ներկայացուցչին նախարար նշանակեն», — նշեց Վայլերը (ներկայացնում է Քրիստոնեադեմոկրատական միությունը)։
Օզդեմիրն իրեն մահմեդական է անվանում, բայց պահանջում է, որ Թուրքիային արգելեն Գերմանիայի մզկիթների ֆինանսավորումը։ Այդ փորձերը համարում է Էրդողանի իշխանությունների «հինգերորդ սյունը» գերմանական հասարակությունում։
Օզդեմիրն Էրդողանին անվանում է բռնապետ և մարդկանց առևանգիչ` զանգվածային քաղաքական բանտարկությունների համար։ Մաքուր խիղճ ունեցող ոչ մի մարդ չի կարող անվտանգության մեջ լինել Թուրքիայում, վստահեցնում է Օզդեմիրը։