ԵՐԵՎԱՆ, 3 մայիսի — Sputnik. Հայաստանի խորհրդարանը ՀՀ վարչապետ ընտրելու երկրորդ փորձը կանի մայիսի 8-ին։ «Ելք» խմբակցությունը Նիկոլ Փաշինյանի թեկնածությունն առաջադրելու համար արագացված կարգով ստորագրահավաք է իրականացնում։ Այս մասին այսօր ԱԺ–ում լրագրողներին հայտնեց «Ելք» խմբակցության անդամ Արարատ Միրզոյանը։
Նա դժվարացավ ասել, թե քանի ստորագրություն է հավաքվել այս պահի դրությամբ` հավելելով, որ «Ելքը», «Ծառուկյանն» ու ՀՅԴ–ն ստորագրությունները հավաքում են առանձին–առանձին։
Լրագրողների մտավախությունը, թե չի՞ փոշմանի արդյոք «Ծառուկյան» խմբակցությունն ու սեփական թեկնածու չի՞ առաջադրի, Միրզոյանն անհիմն որակեց։
««Ծառուկյան» խմբակցությունն արդեն իր դիրքորոշումը հայտնել է առաջին քվեարկության ժամանակ` մայիսի 1-ին, և պարոն Ծառուկյանը նույնպես կողմ էր քվեարկել Նիկոլ Փաշինյանին թեկնածությանը»,– ասաց Միրզոյանը։
Նա հույս հայտնեց, որ ՀՀԿ–ն նույնպես կսատարի ընդդիմության թեկնածուին, ինչպես որ խոստացել է։
Հիշեցնենք` մայիսի 1-ին ԱԺ մեծամասնություն կազմող ՀՀԿ–ն դեմ քվեարկեց Փաշինյանի թեկնածությանը, թեև նախապես հայտարարել էր, թե չի խոչընդոտելու ժողովրդի թեկնածուի ընտրությանը։
Մայիսի 8-ին նշանակված է ՀՀ վարչապետի երկրորդ ընտրությունը, որին թեկնածու առաջադրելու համար խորհրդարանական ուժերը պետք է ունենան պատգամավորների 1/3–ի` 35 պատգամավորի աջակցությունը։ Ընտրվելու համար թեկնածուն պետք է ստանա առնվազն 53 ձայն։