ԵՐԵՎԱՆ, 4 սեպտեմբերի — Sputnik. Լուրերն այն մասին, որ իր անվտանգության աշխատակիցները մասնակցել են մարտի 1-ի իրադարձություններին, ԲՀԿ նախագահ Գագիկ Ծառուկյանն իր նկատմամբ շանտաժ է համարում։
Այս մասին նա հայտարարել է այսօր, լրագրողների հետ զրույցում։
«Եթե Ծառուկյանը կապ ունի Մարտի 1-ի հետ, ուրեմն Ծառուկյանին թող մասսայաբար հրապարակում գնդակահարեն»,- ասել է նա։
ԲՀԿ առաջնորդը հերքել է լուրերն այն մասին, որ իր անվտանգության աշխատակիցները 2008թ.–ի մարտի 1-ին բռնություն են կիրառել ցուցարարների նկատմամբ։
«Ով որ այդպիսի բան է տարածել, նա անբարոյական ընտանիքի մարդ է, որովհետև Ծառուկյանը թույլ չէր տա, որ ժողովրդի մատը փուշ մտներ»,– ասել է նա։
Հիշեցնենք, ՀՀ հատուկ քննչական ծառայությունը 08.08.2018թ.-ին տարածած հաղորդագրության մեջ հայտնել էր, որ իրականացվում են անհրաժեշտ քննչական և օպերատիվ-հետախուզական գործողություններ ԱԺ նախկին նախագահ Հովիկ Աբրահամյանի տանը հայտնաբերված զենքի ձեռք բերման աղբյուրները և դրանց` 2008 թվականի մարտի 1-ին և 2-ին գործադրված լինելու հանգամանքը:
Այդ նպատակով նշանակվել է նաև դատաձգաբանական փորձաքննություն, որի եզրակացությունը դեռևս չի ստացվել։ Նույն թեմայի շուրջ այսօր հայտարարել է ՀՀ հատուկ քննչական ծառայությունը։