ԵՐԵՎԱՆ, 30 հուլիսի — Sputnik. Ոստիկանության բաժանմունքներ այցելած ՄԻՊ աշխատակիցները փաստաբանի մուտքը ոստիկանության բաժիններ խոչընդոտելու դեպքեր են արձանագրել: Այս մասին հայտնում են Մարդու իրավունքների պաշտպանի (ՄԻՊ) գրասենյակից:
«Ոստիկանության ծառայողները չունեն որևէ իրավունք խոչընդոտելու փաստաբանի մուտքը ոստիկանության բաժին կամ բերման ենթարկվածի պահման վայր: Այս պահանջը չապահովելը օրենքի կոպիտ խախտում է»,- ասված է ՄԻՊ-ի տարածած հաղորդագրության մեջ:
Ի դեպ, ՄԻՊ աշխատակիցների այցերի առաջնահերթ նպատակներից մեկ էլ քաղաքացիների հենց այս իրավունքի իրացումն ապահովելն է եղել:
Այսօր առավոտից ՄԻՊ ներկայացուցիչներն այցելել են Ոստիկանության բաժիններ, քանի որ բազմաթիվ հաղորդումներ են ստացել քաղաքացիներին անհիմն բերման ենթարկելու, նրանց նկատմամբ բռնություն գործադրելու, զանգի իրավունքը չապահովելու վերաբերյալ:
Մարդու իրավունքների պաշտպան Արման Թաթոյանն այցելել է նաև ոստիկանության կիրառած հատուկ միջոցներից տուժած Սարի թաղի բնակիչներին, տեղում արձանագրել նրանց հասցված գույքային վնասի մասին փաստեր: