ԵՐԵՎԱՆ, 18 նոյեմբերի — Sputnik. «Միսս Աշխարհ 2017» մրցույթում Հայաստանը ներկայացնող «Միսս Արմենիա 2017» տիտղոսակիր Լիլի Սարգսյանը չի անցել նախընտրական փուլն ու դուրս է մնացել եզրափակչից, գրված է մրցույթի կայքում:
«Հայ մասնակիցը մրցում էր Ավստրալիայի, Ֆրանսիայի, Գերմանիայի, Եգիպտոսի և Յամայկայի ներկայացուցիչների հետ: Նախապատվությունը տրվել է Ֆրանսիային»,- գրված է հաղորդագրության մեջ:
Մասնագիտության ընտրության վերաբերյալ հաղորդավարի հարցին Լիլին պատասխանել է, որ մասնագիտության մեջ նրան գրավում է գեղեցիկ ամեն բան: Նա անտարբեր չէ գեղեցկության նկատմամբ, առավել ևս, որ փոքր տարիքից զբաղվում է նկարչությամբ: Միսս Հայաստանը դիզայների մասնագիտություն է ստանում:
«Միսս աշխարհ 2017» մրցույթը տեղի է ունեցել Չինաստանի Սանյա քաղաքում:
«Միսս աշխարհ 2017» տիտղոսը նվաճեց Հնդկաստանի 20-ամյա ներկայացուցիչ Մանուշի Չհիլարը: Երկրորդ տեղը զբաղեցրեց մեքսիկացի Անդրեա Մեզեն, իսկ երրորդը` Մեծ Բրիտանիայի ներկայացուցիչ Ստեֆանի Հիլը:
«Միսս աշխարհ» գեղեցկության միջազգային մրցույթն անցկացվում է ամեն տարի՝ սկսած 1951 թվականից և Miss Universe, Miss International Beauty և Miss Earth մրցույթների հետ մեկտեղ համարվում է նման մրցույթների շարքում առավել հեղինակավորներից մեկը: