ԵՐԵՎԱՆ, 27 նոյեմբերի – Sputnik. ԱՄՆ-ի Կալիֆոռնիա նահանգում բռնկած անտառային հրդեհների զոհերի թվում, ըստ նախնական տվյալների, կա ազգությամբ երկու հայ, ևս մեկն անհետ կորածների ցանկում է: Sputnik Արմենիային այս մասին ասաց ՀՀ արտաքին գործերի նախարարության մամուլի խոսնակ Աննա Նաղդալյանը:
Նրա խոսքով՝ հրդեհների հետևանքով վնասվել է նաև հայ ընտանիքներին պատկանող 3 տուն:
Կալիֆոռնիայի իշխանություններն առայժմ չեն կարողացել պարզել 203 մարդու ճակատագիրը՝ նահանգի հյուսիսային մասը ճարակած բնական հրդեհից հետո:
Հիշեցնենք, որ Կալիֆոռնիայի հյուսիսում նոյեմբերի 8-ին բռնկել էր նահանգի պատմության մեջ ամենախոշոր հրդեհը, որը մեկուսացվել է 95 տոկոսով։