ԵՐԵՎԱՆ, 15 օգոստոսի – Sputnik. Ադրբեջանում մարդու իրավունքների բացահայտ խախտումների առումով Արևմուտքը որևէ ճնշում չի գործադրում: Ինչպես «Sputnik-Արմենիա» ռադիոկայանի հետ զրույցում նշել է Ադրբեջանի հարցերով փորձագետ Անժելա Էլիբեգովան, այս պահի դրությամբ, բացի հայտարարություններից, Արևմուտքը որևէ կոնկրետ քայլ չի անում:
Ադրբեջանցի իրավապաշտպան ամուսիններ Արիֆ և Լեյլա Յունուսների դատավարությունը բավական լայնամասշտաբ կերպով լուսաբանվում էր արևմտյան մամուլում: Չնայած այն հանգամանքին, որ դատարանի դահլիճ էին թողնում միայն իշխանամետ լրատվամիջոցների ներկայացուցիչներին: Արևմտյան դեսպանությունների ներկայացուցիչները, իրավապաշտպան կազմակերպությունները փորձել են ինչ-որ կերպով ներկա լինել դատավարությանը, սակայն, ինչպես նկատում է ադրբեջանագետը, իրականում, այդ ամենը ոչնչով չօգնեց:
«Լեյլա Յունուսին դատապարտեցին 8.5 տարով, իսկ ամուսնուն` 7 տարով: Այժմ նրանք ծայրահեղ ծանր առողջական վիճակում են: Կա մտավախություն, որ նրանք կարող են ուղղակի մահանալ բանտում: Դատավճռի հրապարակմանը հաջորդել են բազմաթիվ հայտարարություններ՝ արևմտյան գրեթե բոլոր միջազգային կազմակերպությունների կողմից, սակայն դրանով ամեն ինչ սահմանափակվել է»,- ասել է Անժելա Էլիբեգովան:
Այս համատեքստում, ի՞նչ է անում Ադրբեջանի քաղաքացիական հասարակությունը, եթե, իհարկե, այդ երկրում գոյություն ունի քաղաքացիական հասարակություն: Այս դիտարկմանն ի պատասխան՝ փորձագետն ընդգծում է՝ Ադրբեջանում վաղուց չկա «քաղաքացիական հասարակություն» ասվածը: «Մարդկանց չեզոքացրել են երեք ճանապարհով. մի խմբին բանտարկել են, մի խմբին՝ սպանել, երրորդ խումբն էլ արտագաղթել է: Հետևաբար՝ այսօրվա դրությամբ խոսել Ադրբեջանում քաղաքացիական հասարակության մասին, հնարավոր չէ»,-նկատել է բանախոսը: