ԵՐԵՎԱՆ, 7 նոյեմբերի- Sputnik. Ռուսական տուրօպերատորներն այլընտրանքային տարբերականեր են առաջարկում այն հաճախորդներին, ովքեր որոշել էին իրենց հանգիստն անցկացնել Եգիպտոսում: Քանի որ արաբական այս պետության ուղղությամբ իրականացվող բոլոր չվերթերը չեղյալ են հայտարարվել, այդ պատճառով զբոսաշրջիկներին առաջարկում են Եգիպտոսում նախատեսված հանգստի փոխարեն ուղևորվել Թուրքիա:
Առաջարկների վերաբերյալ հայտարարությունները հրապարակվում են Ռուսաստանի տուրօպերատորների ասոցիացիայի կայքում:
«Պեգաս Տուրիստիկ», Coral Travel, Nordwind և BRISCO տուրօպերատորներն առաջարկում են Եգիպտոսը փոխարինել թուրքական հանգստավայրերով, իսկ «Բիբլո Գլոբուսը» պատրաստ է իր հաճախորդներին ուղևորել դեպի Կիպրոս:
«TUI Ռոսիա» տուրօպերատորը, բացի հանգստի այլընտրանքային տարբերակներից, զբոսաշրջիկներին առաջարկում է նաև վերադարձնել ուղեգրերը՝ առանց որևէ տուգանք վճարելու: Զբոսաշրջային փաթեթների այլընտրանքային տարբերակների մասին հայտարարություն է հրապարակել նաև «Նատալի Տուրս» օպերատորը: