ԵՐԵՎԱՆ, 20 հուլիսի — Sputnik. Ամերիկյան Linkin Park ռոք-խմբի մենակատար Չեսթեր Բենինգթոնի մարմինը գտել են երգչի Կալիֆոռնիայի տանը։ Առաջինն այդ մասին հայտնել է TMZ պորտալը՝ հղում անելով իրավապահ մարմիններում իր աղբյուրներին։
Ավելի ուշ ոստիկանությունը հաստատել է այդ տեղեկությունը այլ պարբերականների։
Բենինգթոնի մարմինը հայտնաբերել են չորեքշաբթի առավոտյան Լոս Անջելեսի իր առանձնատանը։ ԶԼՄ-երի տվյալների համաձայն՝ Բենինգթոնը կախվել է։ Նա 41 տարեկան էր։
Բենինգթոնը ընկերություն էր անում կիթառահար, երգահան և Soundgarden ֆրոնթմեն Կրիս Կորնելի հետ, որը ինքնասպան է եղել այս տարվա մայիսին։ Հուլիսի 20-ին Կորնելը 53 տարեկան կդառնար։
Խմբի ամենահայտնի ալբոմը Meteora-ն է, Linkin Park-ը հայտնի է այնպիսի կատարումներով, ինչպիսին են՝ Faint, In The End, Crawling, Numb, Breaking The Habit.