06:16 24 հոկտեմբերի 2017
Ուղիղ եթեր
Ամանորի սեղան

Ուտելիքի պաշտամունք, կամ հայկական Նոր տարի

Damaia
Վերլուծություն
Ստանալ կարճ հղումը
91 0 0

Ավանդական հայկական Ամանորի տոներին անպակաս են ուտելիքի ու խմիչքի առատությունից ճկվող սեղանները, սակայն դա միշտ չէ, որ «լավ կյանքի» հետևանք է:

Դավիթ Գալստյան, Sputnik.

Հայկական հյուրընկալության ավանդույթներն (հատկապես Նոր տարվան) իհարկե, լավ է պահպանելը, սակայն ամեն ինչին սահման կա: Հայաստանի շատ ընտանիքներում Ամանորի տոներն ընդունված է տոնել լավ զինված, այսինքն՝ առատ սեղաններով, մեկ շաբաթվա համար ուտելիքի և խմիչքի պահուստներով:

Շեֆ-խոհարար Արմենը բացահայտում է տոնական սեղանի գաղտնիքները
© Sputnik. Կարեն Եփրեմյան, Լիլիթ Հարությունյան

Տոնին նախապես են պատրաստվում` գնում անհրաժեշտ ամեն բան, տնային տնտեսուհիները (տան մեծից մինչև փոքրը) կամաց-կամաց պատրաստում են իրենց ֆիրմային ուտեստները, սեղան գցում, տնեցիներին ուղարկում «պակաս-պռատ» ապրանքը գնելու:

Որքան էլ զարմանալի լինի, անկախ նախատոնական թոհուբոհի ու նախապատրաստության, դեկտեմբերի 31-ի կեսգիշերին մի շարք ընտանիքներում կանայք դեռ պատրաստություն են տեսնում խոհանոցում և հասցնում սեղան նստել վերջին պահին: Կարելի է միայն պատկերացնել, թե ինչ գլխացավանք է Նոր տարին հայ կնոջ համար:

Դեկտեմբերի 31-ին մինչև ժամը 12-ը կամ էլ մինչև առաջին հյուրերի ընդունումը Ամանորի սեղանը ձեռք տալ չի կարելի: Այն հյուրերի համար, ինչ ցանկանում ես համտեսել՝ կարող ես ուտել միայն խոհանոցում: Այդքան մանրակրկիտ ու երկար ժամանակ պատրաստվող սեղանի տեսքը փչացնել խստիվ արգելվում է:

Հունվարի 1-ի վաղ առավոտից ծանոթները, բարեկամները (որոնք կարող են միայն տարին մեկ անգամ իրար տեսնել), ընկերները և հարևանները շտապում են ավանդույթի համաձայն միմյանց շնորհավորել, այցելել մեկի տուն, հետո՝ մյուսի, հետո էլի ինչ-որ մեկի Ամանորը շնորհավորել (այլապես կարող են նեղանալ):

Ընդ որում՝ ամեն տանը պետք է անպայման մի բան համտեսել, խմել, հիշել անցած տարին, զրուցել ծանոնթերի, բարեկամների հետ, ասել, թե ինչպես են մեծացել երեխաները մեկ տարվա ընթացքում: Մի խոսքով, ամեն ինչ շատ լավ է և ավանդական…

Ամեն ինչ իսկապես լավ կլիներ, եթե չլիներ մի հանգամանք: Նոր տարվա օրերին այնքան է ծանրաբեռնվում ստամոքսը, որ հետո գալիս է «հատուցման» պահը: Եվ առաջին հերթին դա վերաբերում է առողջությանը, երկրորդ հերթին` ֆինանսներին: Սակայն, այս դեպքում խոսքը դիետայի մասին չէ:

Շատ ընտանիքների ֆինանսական կարողություններն այս ամենը իրականություն դարձնելու համար նույնիսկ ցանկության դեպքում սահմանափակ են (ոմանք էլ բացարձակ նման ցանկություն չունեն, սակայն «ավանդույթը» պարտադրում է): 

Ամանորին տրամադրվող սպառողական վարկի քանակը բանկերում ավելանում է 30-40%: Եվ սա միայն պաշտոնական թվերն են:

Որքան են մարդիկ պարտք վերցնում ընկերներից, բարեկամներից, ընկերների բարեկամներից, բարեկամների ընկերներից՝ հայտնի չէ: Ընկերներից պարտք կամ վարկ վերցնելը վատ չէ, եթե, իհարկե, կարող ես մարել այդ գումարը:

Հենց Ամանորից հետո է գալիս «հատուցման» ծանր պահը:

Այ թե ինչու վերջին տարիներին ընտանիքների մի մասը, հատկապես երիտասարդները, գերադասում են մեծ գումարները ծախսել ոչ թե «արժանի սեղան» գցելու համար, այլ Ամանորին ուղևորության մեկնելու վրա:

Պետք է հիշել, որ Նոր տարին ոչ թե ճոխ սեղանների տոն է թեև, ցավոք, որոշ մարդկանց համար դա այդպես է, այլ մեկ ուրիշ բանի:

Չէ՞ որ ինչպես տարին սկսես, այդպես էլ այն կանցնի. պետք չէ տարին պարտքով սկսել: Միգուցե այդ ժամանակ այն ավելի լավը կլինի…

Նյութի ռուսերեն տարբերակը

Գլխավոր թեմաներ