18:06 20 հոկտեմբերի 2018
Ուղիղ եթեր
  • USD483.80
  • GBP630.39
  • EUR554.58
  • RUB7.37
«Արարատ» ֆուտբոլային ակումբ

«Արարատ Մոսկվան» ստացել է Երևանի գրանցում և հանդես կգա Հայաստանում

© ВКонтакте/Официальная страница ФК "Арарат"
Վերլուծություն
Ստանալ կարճ հղումը
63610

2017 թվականի ֆուտբոլային տարին եզրափակվեց մի նորությամբ, որը հաստատում է, որ հաջորդ մրցաշրջանում բարձրագույն խմբի թիմերի շարքում մենք կտեսնենք «Արարատ Մոսկվա» թիմը, որը ստացել է երևանյան գրանցում:

Խաչիկ Չախոյան, Sputnik.

Ֆուտբոլասերները շատ լավ գիտեն, որ Ռուսաստանի երկրորդ լիգայի «Կենտրոն» գոտում հանդես է գալիս «Արարատ»(Մոսկվա) թիմը: Բայց այս երկու մայրաքաղաքներում գրանցում ստացած թիմերը ունեն միայն մեկ ընդհանրություն՝ սեփականատերը:

Հայ հայտնի գործարար Սամվել Կարապետյանը սպորտում առաջին անգամը չէ, որ հանդես է գալիս տարբեր նախագծերով ու իր հովանավորչությամբ: Երկար ժամանակ նա ՀՀ ըմբշամարտի ֆեդերացիան էր հովանավորում, իսկ հետո, ինչպես ասում են, հերթը հասավ նաև ֆուտբոլին: Ռուսաստանի մայրաքաղաքում «Արարատ» ֆուտբոլայի ակումբի հիմնադրումն, իհարկե, շատ կարևոր նշանակություն ուներ: Նորաստեղծ թիմը լուրջ ներդրումների շնորհիվ համալրվեց շատ փորձառու ու միաժամանակ նաև երիտասարդ ֆուտբոլիստներով: Եվ իզուր չէ, որ Մոսկվայի «Արարարտը» հետապնդողների նկատմամբ մեծ առավելությամբ գլխավորում է մրցաշարային աղյուսակը երկրորդ լիգայի «Կենտրոն» գոտում:

Հիմա արդեն հայտնի է, որ Երևանում էլ գրանցում է ստացել «Արարատ Մոսկվա» թիմը: Շատերի մոտ հարց է առաջանում, թե ինչ կապ կարող են ունենալ Հայաստանի և Ռուսաստանի մայրաքաղաքներում գրանցված «Արարատ» անունը կրող թիմերը: Իրավաբանորեն այս թիմերը իրար հետ կապ չունեն, քանի որ գրանցված են տարբեր երկրներում: Մյուս հարցը՝ կապված թիմի անվան հետ, նույնպես լուծում ունի: Հայաստանի բարձրագույն խմբում կարող են հանդես գալ «Արարատ»(Երևան) ու «Արարատ Մոսկվա» (Երևան) թիմերը:

Ֆուտբոլի Հայաստանի ֆեդերացիայի նախագահ Ռուբեն Հայրապետյանն արդեն այդ կապակցությամբ նշել է. «Սամվել Կարապետյանը Հայաստանում ստեղծել է «Արարատ Մոսկվա» անունով թիմ: Չեմ լսել, որ Մոսկվայի «Արարատը» հանդես է գալու Հայաստանում»: Հայաստանի ֆուտբոլային գերատեսչության ղեկավարի խոսքը մեկ անգամ ևս ապացուցում է, որ այս երկու թիմերը իրավաբանորեն իրար հետ կապ չունեն: Նորաստեղծ թիմը բարձրագույն խմբում հանդես է գալու «Ավան Ակադեմիա» թիմի փոխարեն: Այսինքն՝ առաջին խմբում հանդես եկող «Ավան Ակադեմիան» վերանվանվում է:

Դժվար է ասել, թե «Արարատ Մոսկվայի» կազմում որ ֆուտբոլիստները կխաղան: Եվ ո՞վ կլինի թիմի մարզիչը: Ժամանակը կտա բոլոր հարցերի պատասխանները: Գաղտնիք չէ, որ ֆուտբոլի Հայաստանի բարձրագույն խմբի առաջնության ցածր մակարդակի հիմնապատճառը մրցաշարի մասնակից թիմերի թիվն է: Հայաստանի չեմպիոնի կոչման համար չորս մրցաշրջանում պայքարում են վեց թիմ, ու աղյուսակը եզրափակողն էլ չի տեղափոխվում առաջին լիգա:

Ներկա դրությամբ Հայաստանի բարձրագույն խումբը հաջորդ մրցաշրջանում կարող են համալրել չորս թիմեր, որոնք առաջին խմբում հանդես են գալիս և չեն հանդիսանում բարձրագույն խմբի թիմերի դուստր թիմերը: «Արցախ», «Լոռի», «Էրեբունի» և «Արարատ Մոսկվա»: Եթե այս ամենը իրականություն դառնա, ապա բարձրագույն խմբում հանդես եկող թիմերի թիվը կհասնի 10-ի:

Սակայն ամեն ինչ դեռևս պայմանական է, որովհետև բարձրագույն խմբում հանդես գալու համար ֆինանսական այլ միջոցներ են հարկավոր: Հուսանք, որ բոլոր ակումբներին էլ կհաջողվի հաղթահարել այդ արգելքը ու հանդես գալ Հայաստանի բարձրագույն խմբի առաջնությունում:

Թիմերի թիվը շատանալու հետ մեկտեղ, կբարձրանա մրցակցությունն ու խաղերը կանցնեն արդեն անհամեմատ դիտարժան պայքարում:

Գլխավոր թեմաներ