14:19 23 հունիսի 2017
Ուղիղ եթեր
Ситуация в Армении

Բաղրամյան պողոտայում ուրբաթ առավոտյան իրավիճակը հանգիստ է

© Sputnik/ Кирилл Каллиников
Հայաստան
Ստանալ կարճ հղումը
5 0 0

Բաղրամյան պողոտայում, որտեղ տեղի է ունենում անժամկետ ակցիա էլեկտրաէներգիայի թանկացման դեմ, գիշերը հանգիստ է անցել, ցուցարարները մաքրում են տարածքը

ԵՐԵՎԱՆ, հուլիսի 3-Sputnik. Երևանի Բաղրամյան պողոտայում, որտեղ ընթանում է անժամկետ ակցիա էլեկտրաէներգիայի սակագնի թանկացման դեմ, գիշերը հանգիստ է անցել, հաղորդում է Sputnik գործակալության թղթակիցը։

Առավոտից ակցիայի մասնակիցները մաքրում են տարածքը։ Ներկա պահին Բաղրամյան պողոտայում, որը շարունակում է փակ մնալ, 20-30 հոգի մարդ կա։

Միաժամանակ սպասվում է, որ ուրբաթ երեկոյան` կապված առաջիկա հանգստյան օրերի հետ, ցուցարարների քանակը կավելանա։

Նախօրեին իրավապահ ուժերը հեռացրել են զրահամեքենաները և ջրցան մեքենաները Բաղրամյան պողոտայից` հիմնավորելով դա նպատակահարմարությամբ, իսկ ոստիկանապետի տեղակալ Վալերի Օսիպյանը հույս է հայտնել, որ ցուցարարները խելամիտ մոտեցում կցուցաբերեն և կբացեն մայրաքաղաքի հիմնական պողոտաներից մեկը։

ՀԾԿՀ–ն հունիսի 17–ին որոշում ընդունեց էլեկտրաէներգիայի սակագնի բարձրացման մասին։ Ըստ որոշման` օգոստոսի 1–ից սակագինը 1 կՎտ/ժ–ի դիմաց կբարձրանա 6,93 դրամով (մոտ 16,7 տոկոսով)։ Ընդ որում` ՀԷՑ–ն իր հայտում առաջարկում էր սակագինը բարձրացնել 40,8 տոկոսով։

ՀԾԿՀ–ի նման որոշումը դժգոհության և վրդովմունքի ալիք բարձրացրեց բնակչության շրջանում։ Եվ արդեն հունիսի 19–ին «Ո′չ թալանին» քաղաքացիական նախաձեռնության կազմակերպած բողոքի ակցիայի մասնակիցները հայտարարեցին Երևանի Ազատության հրապարակում եռօրյա նստացույցի անցկացման մասին` նախազգուշացնելով, որ իրենց պահանջները չկատարելու դեպքում հունիսի 22–ին նրանք կուղղվեն նախագահի նստավայր։ Հունիսի 23–ի վաղ առավոտյան ոստիկանները հատուկ տեխնիկայի օգնությամբ ցրեցին ցուցարարներին։ Տուժեց մոտ 25 մարդ:

Զանգվածային ակցիան վերսկսվեց նույն օրը երեկոյան։ Ցույցերը խաղաղ բնույթ էին կրում։ Բողոքի ակցիայի մասնակիցները պահանջում էին չեղյալ հայտարարել Հանրային ծառայությունները կարգավորող հանձնաժողովի հունիսի 17–ի որոշումը, որը վերաբերում է էլեկտրաէներգիայի սակագնի բարձրացմանը և պատժել խաղաղ ակցիան ցրելու ժամանակ լիազորությունները չարաշահողներին։ Այս պահին Բաղրամյան պողոտան շարունակում է փակ մնալ։

Հունիսի 27–ին ՀՀ նախագահ Սերժ Սարգսյանը հայտարարեց, որ ՀՀ կառավարությունն իր վրա կվերցնի էլեկտրաէներգիայի սակագնի բարձրացման հետ կապված ողջ բեռը մինչև ՀԷՑ–ի («ՒՆՏԵՐ ՌԱՕ ԵԷՍ» ընկերության դուստ ընկերություն) աուդիտի արդյունքների ստանալը։ ՀԷՑ–ի աուդիտի անցկացման պայմանավորվածությունը ձեռք է բերվել հունիսի 26–ին` ՀՀ նախագահ Սերժ Սարգսյանի և հայ–ռուսական միջկառավարական հանձնաժողովի համանախագահ, ՌԴ տրանսպորտի նախարար Մաքսիմ Սոկոլովի հանդիպման ժամանակ։

Գլխավոր թեմաներ