ԵՐԵՎԱՆ, 7 հուլիսի – Sputnik. Հայաստանում բիոբանկ ստեղծելու հնարավորությունները քննարկվեցին երկուշաբթի Հայաստանի առողջապահության նախարարությունում հրավիրված խորհրդակցության ժամանակ, հայտնում է գերատեսչության կայքը։
Ըստ հաղորդագրության` բիոբանկը ենթադրում է բնակչության կամ որոշակի խմբի բիոլոգիական լայնածավալ նյութի հավաքագրում ու պահպանում:
Բիոբանկի ստեղծման հարցում իրենց տեսակետը հայտնեցին Դանիայից Հայաստան ժամանած Կոպենհագենի համալսարանի բժշկական ֆակուլտետի ներկայացուցիչներ Մարիամ Գրիգորյանը և Նունե Համբարձումյանը, ովքեր երկար տարիներ համագործակցում են Բժշկական գենետիկայի և առողջության առաջնային պահպանման կենտրոնի հետ։
Հյուրերի տեղեկացմամբ` Դանիայում ստեղծվում է աշխարհում ամենամեծ բիոբանկը: Նրանք նշեցին, որ ժամանակակից բժշկությունը դասական բուժման եղանակներից անցնում է անհատականացված մոտեցման, որը բուժում է ոչ թե հիվանդությունը, այլ մարդուն։
Մարիամ Գրիգորյանի գնահատմամբ` բիոբանկերի ստեղծումն ունի, նախևառաջ, սոցիալական, ինչպես նաև մասնավոր նշանակություն։ Միաժամանակ, բիոբանկը ենթադրում է խոշոր դեղարտադրող ընկերությունների ներգրավում:
Հայաստանի Հանրապետության առևտրաարդյունաբերական պալատի Հունգարիայում և Ավստրիայում ներկայացուցիչ Արտակ Ուդումյանն իր հերթին ներկայացրեց բիոբանկերի ստեղծման մեկ այլ տարբերակ, ընդգծելով, որ աշխարհում առկա է բիոբանկերի երեք տեսակ` հանրային, հիբրիդային և մասնավոր:
Ուդումյանը նշեց, որ բիոբանկերի գործունեության համար անհրաժեշտ են համապատասխան պահպանման վայրը, լաբորատորիա, սառնարանային պայմաններ, անվտանգության կանոնների ապահովում:
Նա խոսեց նաև ցողունային բջիջների բանկի ստեղծման, պորտալարի արյան հավաքագրման մասին, միաժամանակ, կարևորելով այն, որ բիոբանկերը գիտահետազոտական աշխատանքների իրականացման և գիտության զարգացման համար կարևոր նախադրյալ են:
Ամփոփելով խորհրդակցությունը` Հայաստանի առողջապահության նախարար Արմեն Մուրադյանը նշեց, որ բիոբանկերի նման ծրագրերի ներդրման և զարգացման համար առաջին հերթին առկա է օրենսդրական բազայի մշակման անհրաժեշտություն:
Հայաստանում բիոբանկ ստեղծելու հեռանկարները քննարկվեցին Հայաստանի առողջապահության նախարարությունում
© Sputnik / Asatur Yesayants
Բաժանորդագրվել
Բիոբանկը ենթադրում է բնակչության կամ որոշակի խմբի բիոլոգիական լայնածավալ նյութի հավաքագրում ու պահպանում:
